Суд во американската држава Ново Мексико ѝ наложи на Мета, сопственикот на Фејсбук и Инстаграм, да плати 567 милиони долари во фонд наменет за рехабилитација на негативните последици што нејзините платформи ги имаа врз менталното здравје на децата и младите. Одлуката доаѓа во втората фаза од големата тужба што компанијата ја загуби во март, кога поротата утврди дека Мета свесно го оштетила менталното здравје на децата и сокрила информации за сексуална експлоатација на деца на своите платформи.
Со новата одлука, вкупната одговорност на Мета се зголеми на 942 милиони долари, вклучувајќи ја претходно изречената казна од 375 милиони долари. Судот нареди поголемиот дел од дополнителните пари, околу 420 милиони долари, да се користат за програми за лекување и поддршка на млади луѓе во Ново Мексико. Преостанатиот износ ќе биде наменет за превенција, едукација, програми за рано откривање и други мерки во текот на следните пет години, објавува „Гардијан“.
Овој случај претставува прв пат суд да ја смета „Мета“ за одговорна за штетните последици од активностите на нејзините платформи. Процесот следеше по истрагите што покажаа дека „Фејсбук“ и „Инстаграм“ биле користени како простор за регрутирање и сексуална експлоатација на деца. Поранешните модератори на содржини изјавија дека во неколку случаи пријавиле материјал поврзан со загрозување на децата, но дека овие случаи не секогаш биле проследувани до надлежните тимови.
Покрај казната, судот ѝ наложи на „Мета“ да спроведе голем број промени на своите платформи. „Фејсбук“ и „Инстаграм“ ќе мора да воведат појасни предупредувања и информативни пораки за безбедносните алатки, заштитата на приватноста и начините за пријавување на несоодветна содржина. Компанијата, исто така, ќе треба да ги подобри системите за проценка на возраста на корисниците, вклучително и користење на вештачка интелигенција за проценка на возраста врз основа на активноста и однесувањето на мрежите.
Судот, исто така, ѝ наложи на „Мета“ да побара доказ за возраста од корисниците за кои ќе утврди дека се под 13 години и да ги третира помладите корисници без сигурна проценка на возраста како деца. Компанијата ќе треба да соработува со училишта или организации за заштита на децата за да создаде систем за пријавување сметки за кои постои сомневање дека им припаѓаат на деца под 13 години. Исто така, ќе мора да ги брише личните податоци собрани од таквите корисници и да го известува судот двапати годишно за напредокот.
Главниот обвинител на Ново Мексико, Раул Торес, ја поздрави пресудата како победа за родителите и децата, додека Мета рече дека не се согласува со одлуката и дека ќе поднесе жалба. Компанијата тврди дека вложува големи напори за да ги заштити корисниците и дека обвинувањата се засноваат на погрешно толкување на фактите. Иако казната е мала во споредба со годишната добивка на Мета од околу 60 милијарди долари во 2025 година, експертите велат дека пресудата би можела да биде почеток на поширок бран судски пресуди што би ги принудиле големите технолошки компании да го променат начинот на кој ги дизајнираат своите платформи.
Фото – Level Agency
