Националната лабораторија за технологија и мрежи за оптички комуникации – дел од Кинеската групација за информатички и комуникациски технологии (CICT) – во соработка со Лабораторијата Пенгченг и компанијата Fiberhome Fujikura Fiber Optic Technology, успешно постигна брзина на оптички пренос во реално време од 3,2 Pb/s (петабити во секунда), користејќи 24-јадрено оптичко влакно со ултра-голем капацитет.
Ова достигнување поставува нов светски рекорд во областа на оптичките комуникации, надминувајќи го претходниот рекорд од 2,5 Pb/s – кој истиот тим го поставил во март оваа година – се наведува на официјалната веб-страница на Одделот за економија и информатички технологии на провинцијата Хубеи (jxt.hubei.gov.cn).
Што точно значи 3,2 Pb/s? Едноставно кажано, претходната брзина од 2,5 Pb/s можеше истовремено да опслужи 2,5 милиони домаќинства кои користат широкопојасен интернет со гигабитни брзини; новото ниво на перформанси, што претставува зголемување од 30%, достигнува 3,2 Pb/s. За просечниот корисник ова значи помазно и пофлуидно онлајн искуство при користење на вештачка интелигенција, облак-пресметување (cloud computing) и видео со висока дефиниција, при што значително се намалува доцнењето (латентноста) – со што дигиталниот и интелигентен начин на живот станува уште пореален.
Оваа година се одбележува 50-годишнината од развојот на првото практично применливо оптичко влакно во Кина. Од „стаклена нишка“ со дијаметар од само 0,2 милиметри, создадена во подножјето на планината Нанванг во 1976 година, па сè до денешната брзина на пренос од 3,2 Pb/s, кинескиот сектор за оптички комуникации поминал долг пат.
„Кинеската групација за информатички и комуникациски технологии (CICT) поседува капацитет да развива сопствени решенија низ целиот индустриски синџир на оптички комуникации – од чипови и уреди до комплетни системи. Групацијата долго време е посветена на истражување во областа на оптичките комуникации на ултра-долги растојанија, со ултра-голем капацитет и ултра-големи брзини, а овој нов пробив е круна на долгогодишните посветени напори“, изјавуваат кинеските истражувачи.
(Vidi.hr)
(фото: Pexels/Atlantic Ambience)


























