Нова магнетна метода наскоро би можела да ги спаси пациентите со камења во бубрези од повторени и болни процедури. Развиена од Џозеф Лиао и неговиот тим на Универзитетот Стенфорд во САД, техниката користи магнетен гел и жица за поефикасно собирање фрагменти од камен од постојните традиционални методи.
Конвенционалните методи често се потпираат на ласери или ултразвук за да ги разбијат камењата на помали парчиња, по што фрагментите се отстрануваат со помош на жичена корпа вметната низ уретрата. Сепак, повторувањето на таквата постапка може да го оштети ткивото и често остава фрагменти, бидејќи околу 40 проценти од случаите резултираат со преостанати парчиња што можат да предизвикаат нови камења.
Во потрага по поцелосно и помалку инвазивно решение, Лиао и неговиот тим претходно создадоа магнетен гел што ги обложува фрагментите од камен во бубрег, дозволувајќи им да бидат привлечени од магнетизирана жица.
Во нивната најнова студија, објавена во списанието Device и спроведена на четири свињи, Лиао и неговиот тим вметнаа десетици фрагменти од човечки камен во бубрег во бубрезите на животните пред да го нанесат гелот. Магнетна жица, водена низ уретрата, успешно собра повеќе фрагменти одеднаш.
Тоа е како да користите стап за да извадите еден куп фрагменти од камен, така што можете да отстраните голема количина одеднаш, вели Лиао за New Scientist.
Споменатиот магнетен уред собрал фрагменти од сите големини, потенцијално минимизирајќи ја траумата на бубрезите и отстранувајќи ги преостанатите парчиња. Тоа е многу ветувачки пристап, изјави Вероника Магданц од Универзитетот во Ватерло, која не била вклучена во студијата.
Ниту една од свињите не покажалр никакви несакани ефекти од гелот. Тоа е многу добра вест. Постапката не е токсична и во никој случај не е штетна, додава Магданц.
Лијао и неговиот тим планираат да започнат со испитувања врз луѓе во рок од една година.
(New Scientist)
