Три од четирите најголеми пазари во ЕУ, кои сочинуваат 63 проценти од сите регистрации на електрични автомобили, забележаа силен раст – Германија 38,9 проценти, Белгија 29,9 проценти и Холандија 7,9 проценти.
И покрај глобалната криза и големите проблеми поради американските царини што влијаат и на европските и на глобалните пазари на автомобили, во првиот квартал од 2025 година, продажбата на нови електрични автомобили се зголеми за 23,9 проценти, на 412.997, што претставува 15,2 проценти од вкупниот пазарен удел во ЕУ. Три од четирите најголеми пазари во ЕУ, кои сочинуваат 63 проценти од сите регистрации на електрични автомобили, забележаа силен раст. Тоа се Германија (38,9 проценти), Белгија (29,9 проценти) и Холандија (7,9 проценти). Ова е во спротивност со Франција, која забележа пад од 6,6 проценти, според најновите податоци од Здружението на европски производители на автомобили (ACEA).
Во Велика Британија, продажбата на електрични возила порасна за 42,6 проценти, со продадени 120.191 електрични автомобили. Гледајќи ги земјите од ЕФТА, лесно можеме да заклучиме дека електричните автомобили стануваат секојдневие таму. Исланд забележа неверојатен раст на продажбата од 128,7 проценти со купени 956 возила (голем резултат соодветен на бројот на жители и не многу поволната клима). Норвежаните имаат раст на продажбата на електрични автомобили од 47 проценти (28.623), а Швајцарците од + 3,0 проценти (10.733).
Вкупно 573.500 електрични возила беа продадени во Европа во првиот квартал од оваа година. Раст од 28,1 проценти.
Кога станува збор за хибридни автомобили, податоците за истиот период покажуваат и зголемување од 20,7 проценти на регистрациите на нови хибридни автомобили во ЕУ, поттикнати од значителниот раст на четирите најголеми пазари. Во Франција (47,5 проценти), Шпанија (36,6 проценти), Италија (+15,3) и Германија (+10,5). Ова доведе до 964.108 регистрирани единици во првиот квартал од 2025 година, што претставува 35,5 проценти пазарен удел во ЕУ.
Регистрациите на хибридни автомобили со приклучоци се зголемија за 1,1 процент во првиот квартал од 2025 година. Ова првенствено беше поттикнато од значително зголемување на обемот на клучните пазари како што се Германија (41,8 проценти) и Шпанија (30,7 проценти). Како резултат на тоа, плаг-ин хибридните автомобили претставуваат 7,6 проценти од вкупните регистрации на автомобили во ЕУ, во споредба со 7,4 проценти во истиот период во 2024 година.
Кога станува збор за бензински автомобили, до крајот на првиот квартал од 2025 година, регистрациите на бензински автомобили забележаа значителен пад од 20,6 проценти, при што сите поголеми пазари забележаа пад. Најголем пад е забележан во Франција, за 34,1 проценти, Германија за 26,6 проценти, Италија за 15,8 проценти и Шпанија за 9,5 проценти.
Со досега регистрирани 779.817 нови автомобили, пазарниот удел на бензинските автомобили падна на 28,7 проценти, во споредба со 35,5 проценти во истиот период минатата година.
Слична е ситуацијата и со дизел автомобилите. Пазарот на дизел возила се намали за 27,1 процент, што резултираше со пазарен удел на дизел возилата од 9,5 проценти во кварталот. Генерално, двоцифрен пад е забележан на повеќето пазари на ЕУ. Продадени се 258.728 дизел возила (354.755 во истиот период минатата година), покажуваат податоците од Српското здружение на увозници на нови возила.
(Politika.rs)
Фото – Wikimedia
