Научници од Универзитетот Тексас во Остин развија текстил способен да ја апсорбира влагата од воздухот и да ја претвори во вода за пиење
Технологијата би можела да им користи на сите што поминуваат многу време во области без лесен пристап до вода за пиење: од планинари, кампери и тркачи до земјоделски работници, работници во итни случаи и војници.
Принципот се базира на специјална ткаенина направена од хидрогел добиен од биомаса. Овој материјал има способност да апсорбира влага од околината, дури и кога е присутна во многу мали количини.
Откако ќе се собере, влагата се насочува кон отстранливи модули за собирање интегрирани во облеката. Овие модули потоа се ставаат во склоплив колектор, каде што сончевата топлина го стимулира ослободувањето на водата во течна форма.
Лабораториските тестови дадоа ветувачки резултати. Во зависност од нивото на влажност во воздухот, јакната може да произведе помеѓу 400 и 900 милилитри вода за пиење дневно. Тоа е речиси количината вода во стандардно шише, произведена директно од атмосферата.
Истражувачите исто така велат дека технологијата, кога ќе се прошири би можела да биде од три до 10 пати поефикасна од традиционалните системи за собирање атмосферска вода.
„Важниот напредок овде е што тимот не само што разви друг материјал што апсорбира вода. Тие дизајнираa начин за брзо движење на водата – од пареа во воздухот, до течност на површината на влакното, па сè до текстилот. Овој транспортен систем му овозможува на материјалот ефикасно да функционира не само во лабораторија, туку и како дел од систем за носење“, рече Кит Џонстон, коавтор на трудот и професор Мекет и претседател на Одделот за хемиско инженерство на Факултетот за инженерство Кокрел.
Истражувачите разгледуваат апликации што се протегаат многу подалеку од облеката, вклучувајќи ранци, шатори, засолништа за итни случаи и друга опрема за надворешна употреба. Ова би можело да им овозможи на секојдневните предмети што луѓето ги носат активно да собираат вода од воздухот.
Во следната фаза од истражувањето тие планираат да ја испитаат примената на технологијата во активности на отворено, далечински операции, реагирање при катастрофи и да обезбедат пристап до вода во сушни области и региони со ограничена инфраструктура.
Овој текстилен систем е развиен како посебен проект од истиот истражувачки тим кој претходно успеа да извлече рекордна количина вода за пиење од воздухот во топлата и сува клима на пустината Чивава во Ново Мексико, како и во повлажните услови на Остин. Ова дополнително го потврди потенцијалот за користење на атмосферската влага за ублажување на проблемот со недостигот на вода за пиење.
(Bug.hr)
