Речиси половина од сите повици на мобилни телефони во 2019 година ќе бидат лажни, покажува едно најново истражување. Роботските повици и телефонските измами доживеаја бум изминатите години – од 3,7% минатата година се зголемија на 29,2% годинава. Доколку продолжи тој тренд, се проценува дека 44,6% од сите повици на почетокот на идната година ќе доаѓаат од измамници.
Oваа проценка доаѓа од американската компанија First Orion, која развива систем за препознавање кој се јавува на телефон и за откривање измами. Тие наведуваат дека ваквите телефонски измами доведоа до тоа луѓето да не се јавуваат на телефон ако не им е познат бројот кој ги бара.
Чарлс Морган од First Orion наведува дека епидемијата од измамнички повици зема се поголеми размери и измамниците се повеќе ја нарушуваат нашата приватност. Потпретседателот на компанијата, Скот Хамбухен, на оваа тема зборуваше и пред американскиот Конгрес и истакна дека од потрошувачите на овој начин секоја година се земаат стотици милиони долари, а измамниците користат се пософистицирани методи на измама.
Американската Сојузна канцеларија за телекомуникација работи со операторите и производителите на уреди на решавање на овие проблеми, но од First Orion велат дека би требало да се направат поефикасни системи за заштита. Морган откри дека најдобриот систем е во самата мрежа кој со помош на аналитичари и машинско учење го открива потеклото на повиците уште пред да дојдат до вашиот телефон.
