Најбогатиот човек во светот и сопственик на компаниите Tesla и SpaceX, Илон Маск, на Twitter направи анкета во која од корисниците на социјалната мрежа бара совет. Имено, ултрамилијардерот не може сам да одлучи дали треба да продаде 10% од акциите во Teslа.
„Во последно време доста се зборува за тоа дека неостварената добивка е средство за избегнување даноци, па затоа предлагам да продадам 10% од своите акции во Teslа. Ќе го применам општото мислење на оваа анкета, без оглед какво е тоа“ напиша Маск на Twitter.
Анкетата е отворена не само за неговите следбеници, кои ги има 62,5 милиони, туку за сите корисници на таа социјална мрежа, а времето за учествување е 24 часа и кој сака може да го даде својот глас.
Резултатите засега велат дека повеќе од половина од „твитерашите“ сметаат дека Маск треба да ги продаде акциите за да плати данок.
„Не примам плата во готово ниту бонуси од каде било. Имам само акции, така што единствениот начин да платам данок е да ги продадам акциите“ појасни Маск.
За потсетување, на крајот на октомври Маск го критикуваше предлогот на демократите во Конгресот да се воведе данок на инвестициската добивка на милијардерите.
(Sputnik)
(фото: Flickr)
