Британски научници открија изгубен прото-микроконтинент под aрктичкиот Дејвис премин, нудејќи нови сознанија за тектонските мистерии на Земјата. Досега непознатиот континент е откриен под јужниот крак на Арктичкиот Океан, формиран пред приближно 60 милиони години. Таа копнена маса долга 400 километри, која се наоѓа под преминот Дејвис меѓу Канада и Гренланд, ја пронашле научници од британскиот Универзитет Дерби додека го проучувале движењето на тектонските плочи во тој регион.
Наречен прото-микроконтинент Дејвис Теснец, тој тектонски блок се одвоил од континентот поради долготрајното расцепување и ширењето на морското дно меѓу Гренланд и Северна Америка, објаснуваат научниците. Прото-микроконтинентот веројатно се одвоил од Гренланд откако тектонските движења го одвоиле регионот од Канада пред околу 118 милиони години.
„Пукнатините и формирањето на микроконтиненти се апсолутно постојани феномени, бидејќи со секој земјотрес може да се случи следното раздвојување на микроконтинентите. Целта на нашата работа е да го разбереме нивното формирање доволно добро за да ја предвидиме токму таа идна еволуција“, изјави д-р Џордан Фетеан за Phys.org.
Откритието е направено со помош на комбинација на податоци за дебелината на кората од гравитационите карти, податоци за сеизмичка рефлексија и тектонско моделирање на плочи. Гравитационите карти даваат информации за густината на карпите и длабочината и дистрибуцијата на изворните карпи на аномалијата.
Во нивната студија британските научници ги реконструирале тектонските движења во текот на приближно 30 милиони години за да разберат како се формирала аномалијата на кората. Тие откриле дека прото-микроконтинентот е дебел меѓу 18 и 22 километри и е поголем од типичните микроконтиненти, кои се дебели меѓу 5 и 25 километри. Ова разбирање е од суштинско значење за континуирано научно истражување.
Нивните техники за мапирање покажале како движењата на морското дно во текот на милиони години го изолирале теренот на релативно густата континентална кора од Гренланд за време на новопризнатата фаза на ширење долж Западен Гренланд.
Теснецот Дејвис содржи значителна концентрација на познати раседни структури со јасни промени во движењето на плочите, што нуди увид во формирањето на микроконтинентите. Прото-микроконтинентите, дел од континенталната литосфера, се формираат кога тектонските плочи на литосферата, поттикнати од полутечниот слој на карпи под нив, се движат и предизвикуваат пукнатини.
Почетниот јаз меѓу Канада и Гренланд започнал пред приближно 118 милиони години, а ширењето на морското дно започнало пред приближно 61 милиони години, што довело до формирање на Дејвис теснецот. Овој процес продолжил приближно 33 милиони години, додека Гренланд не се судрил со островот Елесмер.
Научниците се надеваат дека нивните наоди ќе помогнат да се разберат другите прото-микроконтиненти ширум светот, како што се микроконтинентот Јан Мајен во близина на Исланд и ридовите Гулден Драак во близина на Западна Австралија.
(Daily Mail)
(фото: Good Fon)
