Од 15 ноември бројот на посетители на Помпеја ќе биде ограничен на 20.000 дневно, по наглото зголемување на бројот на посетители. Помпеја, град закопан во ерупцијата на Везув во 79 година од нашата ера, е едно од најдобро зачуваните места на антички Рим.
Ерупцијата на Везув заштитуваше речиси недопрени урнатини повеќе од 2.000 години под дебел слој од пепел. Габријел Зутригел, директор на локацијата, рече дека со цел зачувување и безбедност на локацијата, важно е да се намали влијанието на сообраќајот на посетители.
Границата од 20.000 посетители дневно веројатно ќе резултира со намалување на бројот на туристи само во неколку наврати со оглед на тоа дека секоја прва недела во месецот бројот на посетители надминува 20.000, бидејќи тогаш влезот е бесплатен.
Рекордни 36.000 туристи го посетиле местото во првата недела од октомври, а во текот на целиот октомври годинава имало 480.000 или во просек околу 15.000 посетители дневно.
Најпрометниот месец годинава бил мај, со околу 517.000 луѓе или околу 16.000 дневно. Но, речиси четири милиони луѓе ја посетиле Помпеја во 2023 година, што е за една третина повеќе од претходната година.
Околу една третина од локалитетот допрва треба да се ископа, што е од голем интерес за археолозите и јавноста, бидејќи локалитетот дава најкомплетна слика за секојдневниот живот во Римската империја.
Оваа година археолозите открија фрески на митски старогрчки ликови, меѓу кои и Елена од Троја и Аполон. Овие уметнички дела се пронајдени во сала за банкет со мозаичен под изграден од повеќе од милион камчиња.
Меѓународен тим од истражувачи ја испитал генетиката на пет лица кои починале за време на ерупцијата на Везув и утврдиле дека жителите на Помпеја потекнуваат од свежи доселеници од источниот Медитеран, пишува веб-страницата Current Biology.
(Bizlife)
(фото: Get Arhive)
