Откако Австралија одлучи да им забрани на децата да користат социјални мрежи, Шведска може да го направи истиот потег, но од различни причини. Австралијците усвоија закон со кој им забранија на децата под 16 години да користат социјални мрежи како Facebook, TikTok и Instagram за да го заштитат своето ментално здравје, додека Шведска треба да ја воведе истата забрана, но поради криминал од банди.
Законот во Австралија стапува на сила следната година и пропишува казни до 32 милиони долари за компаниите кои нема да го блокираат пристапот за децата помали од 16 години. Поддржувачите на законот веруваат дека забраната е неопходен одговор на загриженоста за менталното здравје на младите поврзано со користењето на социјалните мрежи.
Од друга страна, шведската влада размислува за воведување старосни ограничувања за социјалните мрежи доколку компаниите не успеат да ги спречат бандите да регрутираат деца преку Интернет за да извршуваат насилни злосторства, вклучувајќи убиства и бомбашки напади, пишува Reuters.
Дискусијата доаѓа во време кога има пораст на насилството поврзано со бандите, што ја направи Шведска земја со највисока стапка на фатални престрелки по жител. Ова е целосно спротивно на ситуацијата во Шведска пред две децении, кога оваа стапка беше меѓу најниските.
Во изминатите две години шведската полиција соопшти дека бандите сè повеќе ги користат социјалните медиуми како дигитални пазари за да регрутираат млади луѓе, некои на возраст од 11 години, за да вршат насилни злосторства во Шведска и во соседните нордиски земји.
Министерот за правда, Гунар Стромер, на средбата со нордиските министри за правда и претставниците на компаниите за социјални медиуми, вклучувајќи ги TikTok, Meta, Google и Snapchat во Копенхаген рече дека ситуацијата е многу сериозна. Тој нагласи дека платформите мора да дадат конкретни резултати во решавањето на овој проблем и посочи дека Шведска е отворена за регулаторни мерки што ги спроведуваат другите земји.
Податоците на шведската полиција откриваат дека за седум месеци од годинава 93 деца помлади од 15 години биле осомничени за вмешаност во планирање убиства, што е трипати повеќе отколку во истиот период минатата година. Данските власти од април регистрирале 32 случаи во кои Швеѓани, често тинејџери, биле регрутирани да извршат насилни дејствија. Затоа данските политичари ги нарекоа деца војници.
Шведскиот министер за образование, Јохан Персон, изрази загриженост за штетното влијание на социјалните мрежи врз децата. Тој рече дека децата во моментов ги отфрлаат своите животи и дека се заробени во кругот на активности поврзани со банди на Интернет.
(Reuters)
(фото: Facebook)
