НАСА во петокот соопшти дека нејзината соларна сонда Parker е безбедна и работи нормално откако успешно го заврши најблиското приближување до Сонцето од вештачки објект во историјата. Леталото помина на само 6,1 милиони километри од површината на Сонцето на 24 декември, летајќи низ надворешната атмосфера на Сонцето, наречена корона, во мисија што треба да им помогне на научниците да дознаат повеќе за ѕвездата најблиску до Земјата.
НАСА соопшти дека оперативниот тим во лабораторијата за применета физика Џон Хопкинс во Мериленд добил сигнал од сондата непосредно пред полноќ во четвртокот. Се очекува леталото да испрати детални телеметриски податоци за неговиот статус на 1 јануари, додаваат од НАСА.
Патувајќи со брзина до 692.000 км/ч, леталото издржа температури до 982 Целзиусови степени, се наведува на веб-страницата на НАСА.
„Оваа студија одблиску на Сонцето ѝ овозможува на соларната сонда Parker да направи мерења кои им помагаат на научниците подобро да разберат како материјалот во тој регион се загрева на милиони степени, потеклото на сончевиот ветер и како енергетските честички се забрзуваат до брзина приближна на брзината на светлината“, велат од НАСА.
Соларната сонда Parker беше лансирана во 2018 година и постепено влегува во сè потесни орбити околу Сонцето, користејќи ја гравитацијата на Венера за време на прелетувањето.
(N1)
(фото: NASA)
