Навигацијата со помош на GPS сигнали не е ништо ново или необично. Речиси и да нема нов автомобил кој веќе нема вграден систем за навигација, а истото важи и за паметните телефони. Во денешно време луѓето се потпираат на GPS и електронски мапи за да стигнат од точка А до точка Б. Но, како да го пронајдете вашиот пат кога сте, на пример, на Месечината?
Иако ќе треба да почекаме уште малку за луѓето повторно да одат на површината на природниот сателит на Земјата, GPS или навигацијата исто така е исклучително важна за контролирање на вселенските летала или возилата на површините на другите планети. Токму тоа успеа да го постигне НАСА, во соработка со Италијанската вселенска агенција, кога го сними првиот лунарен GNSS (Глобален сателитски систем за навигација) навигациски сигнал. Тоа е систем кој прима и следи навигациски сигнали од површината на Месечината и ги испраќа на Земјата.
Овие резултати значат дека мисиите Artemis на НАСА или другите истражувачки мисии би можеле да имаат корист од овие сигнали за прецизно и автономно да ја одредат нивната позиција, брзина и време. Ова претставува отскочна даска за напредни навигациски системи и услуги за Месечината и Марс, истакнуваат од НАСА.
На Земјата можеме да користиме GNSS сигнали за да навигираме сè: од паметни телефони до авиони, велат од НАСА. Сега ова ни покажува дека можеме успешно да примаме и да следиме GNSS сигнали на Месечината. Ова е многу возбудливо откритие за лунарната навигација и се надеваме дека ќе ја искористиме оваа способност за идни мисии, додаваат оттаму.
Клучниот момент се случи кога LuGRE (Lunar GNSS Receiving Experiment) сними и следеше сигнали на површината на Месечината за прв пат во историјата на 3 март и ја коригираше навигацијата за лунарниот лендер Blue Ghost.
Тој, исто така, ги собори GNSS рекордите на своето патување до Месечината, земајќи сигнал од надморска височина од околу 340 илјади километри од Земјата. Неговиот висински рекорд продолжи да се искачува додека LuGRE стигна до лунарната орбита – повеќе од 390 илјади километри од Земјата. Ова значи дека мисиите во цислунарниот простор, регионот на вселената помеѓу Земјата и Месечината, исто така би можеле да се потпираат на GNSS сигналите за навигациските корекции.
Имено, користењето GNSS сигнали за навигација може да ја намали зависноста од човечките оператори, бидејќи овие сигнали може да се фатат и да се користат автономно од леталото, дури и на големи растојанија.
(NASA)
(фото: Pexels)
