Непредвидливите потези на Доналд Трамп во однос на царините имаа влијание на берзите, со големи падови и ненадејни зголемувања. Додека ги паузираше царините за другите земји 90 дена, тој уште повеќе ја притиска Кина и прашање е како ќе се развива ситуацијата во иднина и дали трговската војна ќе продолжи и какво ќе биде нејзиното влијание врз берзите и компаниите во иднина.
Една од компаниите најранливи во оваа ситуација е Apple, а за да се подготват за она што доаѓа и да го ублажат влијанието на тарифите, Кук и тимот неодамна го забрзаа производството на телефони. Според Reuters, Apple изнајмил транспортни авиони кои ги наполнил со дури 600 тони iPhone за да ги испрати во САД.
Ова се однесува на околу 1,5 милиони уреди кои компанијата ќе ги складира во САД за да го преброди почетниот период на царинските војни, а Apple се надева дека ситуацијата ќе се реши, односно дека ќе се најде договор за царините.
Со оглед на тоа дека Apple е значително зависен од кинескиот увоз, а царините се зголемени за дополнителни 125%, не е тешко да се заклучи дека влијанието врз оваа компанија, односно цените на нивните производи, може да биде огромно.
Колку Apple се брзаше што поскоро да испрати телефони од Индија во САД најдобро говори податокот дека од надлежниот орган за воздушен транспорт побарале одобрение за пократко време за царинење на нивните производи – наместо 30, тоа време било скратено на само 6 часа. Кога добиле зелено светло, од аеродромот Ченаи во индиската држава Тамил Наду кон САД полетале 6 авиони со носивост од околу 100 тони, сите полни со iPhone.
За да се подготви за новите царини, Apple побарал од Foxconn во Индија да го забрза производството, па оваа компанија вработила нови луѓе и вовела смени и во текот на неделата, наведува Reuters. Токму со цел да се спречи зависноста од Кина, Apple во последните години го диверзифицираше производството на своите уреди на други пазари. За ваквите планови Индија им е од најголема важност, а два од нивните најголеми добавувачи (Foxconn и Tata) имаат три фабрики во оваа земја, а две се уште се во изградба.
(Dnevnik.hr)
