На 18 јули Европската комисија предложи прилагодување на таксата за овластување за патување според Системот за информации и овластување за патување на ЕУ (ETIAS), зголемувајќи ја од 7 на 20 евра.
„Билетот“ за ЕУ ќе се наплаќа кога ETIAS ќе стане оперативен, што се очекува во последниот квартал од 2026 година. Ќе го плаќаат патници кои не се од ЕУ.
Регулативата за Системот од 2018 година утврди такса од 7 евра, но земајќи го предвид зголемувањето на инфлацијата оттогаш и дополнителните оперативни трошоци поврзани со, на пример, нови технички можности, таксата ќе се прилагоди на 20 евра по барање и ќе важи три години.
Така, оваа такса, која беше најавена, но одложувана долго време, стана поскапа дури и пред да биде воведена.
Комисијата изјави дека Брисел на тој начин ќе ја усогласи цената на овластувањето за патување во ЕУ со слични програми, како што се британската ETA и американската ESTA.
Кој нема да го плаќа „билетот“?
Кандидатите под 18 години или над 70 години, како и членовите на семејствата на граѓаните на ЕУ и членовите на семејствата на државјаните на трети земји, кои имаат право слободно да се движат низ ЕУ, ќе бидат ослободени од такси.
Апликацијата за овластување за патување ќе се пополнува онлајн и ќе содржи лични информации, како што се име, датум на раѓање и број на пасош.
Апликацијата ќе се обработува автоматски и патникот ќе добие одлука во рок од неколку минути.
Предлогот за прилагодување на таксата сега е предмет на двомесечен преглед од страна на Советот и Европскиот парламент и ќе стапи во сила кога ETIAS ќе стане оперативен.
Како што објави Комисијата, ETIAS е дел од новата ИТ архитектура на ЕУ, насочена кон зајакнување на безбедноста во Унијата и олеснување на патувањето за државјаните на трети земји.
(Beta)
