Научници од Кинескиот универзитет во Хонгконг развија технологија што овозможува вода да се извлекува од лунарната почва, а потоа да се преработува во кислород и хемиско гориво.
Почвата на Месечината можеби не е само безживотна прашина – таа би можела да биде клучот за опстанокот на човечкиот вид во вселената, според ново истражување.
Имено, тим од истражувачи успеа да развие технологија што користи сончева светлина за да извлече вода од лунарната почва, а потоа да ја користи таа вода за да го претвори јаглерод диоксидот во кислород и хемиско гориво. Оваа иновација би можела значително да го олесни идното истражување на длабокиот вселенски простор.
Според труд објавен во престижното списание Joule, објавен од Cell Press, оваа технологија би можела „да ја отвори вратата кон нова ера на истражување на вселената“, бидејќи решава еден од најголемите проблеми – претерано високата цена на испорака на ресурси како што е водата до Месечината.
За потсетување, литар вода транспортирана со ракета до Месечината чини огромни 83.000 долари (околу 71.000 евра). И еден астронаут пие просечно 15 литри вода дневно.
„Немавме поим колку „магична“ вредност има лунарната почва“, рече водечкиот истражувач д-р Лу Ванг.
Сепак, постојните системи за вадење вода од лунарната површина бараат повеќе чекори кои трошат огромни количини енергија и не даваат јасни податоци за тоа колку точно CO₂ се користи за производство на горивото.
И покрај потенцијалот, научниците истакнуваат дека екстремните услови на Месечината, вклучувајќи ги драстичните температурни флуктуации, високото зрачење и ниската гравитација, сепак ќе претставуваат огромен предизвик за собирање кислород и вода директно од земјата. Исто така, количината на јаглерод диоксид што астронаутите ја произведуваат преку дишење нема да биде доволна за да ги задоволи сите потреби за вода, кислород и гориво за време на долгите мисии.
(Euronews)
(фото: Pexels)
