Со години слушаме дека 10.000 чекори дневно се златен стандард за добро здравје. Сепак, нова голема анализа објавена во престижниот магазин The Lancet Public Health покажува дека оваа бројка не е неопходна, а можеби дури и не е најефикасна.
Според резултатите, само 7.000 чекори дневно значително го намалуваат ризикот од голем број болести – вклучувајќи деменција, срцеви заболувања, дијабетес тип 2, депресија, па дури и одредени видови рак.
Студија во која учествувале повеќе од 160.000 луѓе од 31 претходна студија покажала дека дури и умерената физичка активност носи огромни здравствени придобивки. Луѓето кои оделе околу 4.000 чекори дневно имале подобри здравствени индикатори од оние кои воделе целосно седентарен начин на живот.
Но, најголемите придобивки биле забележани кај оние кои го достигнале прагот од 7.000 чекори:
-38% помал ризик од деменција
-28% помал ризик од паѓање кај постарите лица
-6% помал ризик од рак
-значително помала веројатност за кардиоваскуларни заболувања и депресија
„Ова истражување го отфрла митот дека 10.000 чекори дневно е единствената цел што треба да се постави за оптимално здравје“, вели д-р Даниел Бејли од Универзитетот Брунел во Лондон.
Брзото одење природно го зголемува срцевиот ритам, ја подобрува циркулацијата, го намалува крвниот притисок и помага во губењето на тежината. Студијата, исто така, истакнува дека зголемувањето на физичката активност – дури и за само 1.000 чекори дневно – може да има јасни здравствени придобивки.
Иако постојат неколку ограничувања на студијата (особено во однос на влијанието врз ракот и деменцијата, бидејќи податоците се собрани од помал број студии), резултатите се охрабрувачки, особено за луѓето кои не успеваат да ги достигнат „познатите“ 10.000 чекори.
Сепак, експертите забележуваат дека бројот на чекори не е сè. Интензитетот на активноста е исто така важен. Здравствените препораки сè уште важат: 150 минути умерена физичка активност неделно (на пр. брзо одење или возење велосипед) или 75 минути енергична активност (на пр. трчање или HIIT тренинг).
Професорот Стивен Хариџ од Кингс колеџ во Лондон, кој не бил дел од студијата, заклучува:
„Оваа анализа го потврдува она што веќе го знаеме – движењето е од суштинско значење за здравјето, а секој чекор кон поголема активност е чекор кон подобра ментална и физичка благосостојба.“
Значи, не мора да броите до 10.000 – само не седете цел ден.
(Bizlife)
