Луѓето во Германија пијат помалку пиво од кога било досега. Во првата половина од оваа година, пиварниците продале вкупно 3,9 милијарди литри алкохолно пиво во земјата и во странство и ова е најслаб резултат од 1993, од кога се води статистика, пренесува ДПА.
Падот е 6,3 проценти во споредба со истиот период минатата година, објави Федералниот завод за статистика. Сличен минус имаше само во првите месеци од пандемијата во 2020 година и повторно во втората половина од 2023 година. За прв пат, продажбата на пиво падна под четири милијарди литри за шестмесечен период.
Продажбата на домашниот пазар, која сè уште сочинува нешто помалку од 82 проценти од вкупниот обем, се намали за 6,1 процент, додека извозот падна уште понагло – 7,1 процент.
„Лошата потрошувачка клима силно ги погодува пиварниците, исто како и секторите за угостителство и малопродажба“, рече Холгер Ајхеле, извршен директор на Германското здружение на пивари.
Тој, исто така, предупреди дека новите царински договори на Европската Унија со САД би можеле дополнително да го зголемат притисокот врз извозниците. Безалкохолното пиво останува светла точка. Податоците покажуваат дека во 2024 година се произведени 579 милиони литри – речиси двојно повеќе од пред десет години. Пазарниот удел сега е девет проценти, што значи дека наскоро секое десетто пиво произведено во Германија ќе биде трезвено.
Едно од осум пива нарачани во рестораните во првата половина од годината било безалкохолно, според мониторингот на пивото Колекс, кој ги анализира нарачките од угостителската индустрија. Југозападниот дел од земјата – кој традиционално претпочита вино – е предводник. Во покраините Рајнска област-Пфалц и Сар, речиси секоја четврта нарачка е безалкохолна.
Од друга страна, директорот на пиварницата „Велтинс“, Фолкер Кул, предупредува да не се преувеличува потенцијалот на овој сегмент поради жестоката конкуренција.
(Biznis.rs)
Фото – Flickr
