Во последниве години научниците ширум светот развија цела низа методи кои се обидуваат да ја поправат забната глеѓ и на тој начин да го спречат развојот на кариес или дури и да го поттикнат телото да гради нови заби.
Така, тим од научници од Кралскиот колеџ во Лондон откри дека протеинот, кој сите го имаме во косата и кожата, може да има позитивен ефект врз здравјето на забната глеѓ, па дури и да ги запре раните фази на расипување.
Тоа е кератинот, кој може да ја имитира структурата и функцијата на природната глеѓ кога ќе дојде во контакт со минералите во плунката.
Како што наведоа во нивната студија објавена во списанието Advanced Healthcare Materials“, пастите за заби со флуор моментално се користат низ целиот свет за да се забави расипувањето на забната глеѓ. Сепак, тие открија дека третманите базирани на кератин можат целосно да го спречат овој процес на расипување.
За да го создадат кератинот потребен за истражувањето, тие се свртеа кон овчјата волна и го извлекоа од неа. Потоа го нанесоа кератинот на површината на забите. Тие откриле дека кога кератинот доаѓа во контакт со минерали природно присутни во плунката, тој формира високо организиран кристален скелет кој ја имитира функцијата и структурата на природната глеѓ. Ова го штити забот, ги затвора изложените нервни канали и ја намалува чувствителноста на забите и обезбедува олеснување.
Но, кератинот не запира тука. Со текот на времето, овој скелет продолжува да привлекува јони на калциум и фосфат, што доведува до раст на заштитен слој.
Кератинот нуди трансформативна алтернатива на сегашните стоматолошки третмани. Не само што е одржливо набавен од биолошки отпадни материјали како коса и кожа, туку ја елиминира и потребата од традиционални пластични смоли, кои често се користат во реставративната стоматологија, кои се токсични и помалку издржливи. Кератинот исто така изгледа многу поприродно од овие третмани, бидејќи може поблиску да се совпадне со бојата на оригиналниот заб, рече првиот автор на студијата, д-р Сара Гамеа.
Тимот веќе истражува како да го изнесе третманот со кератин од лабораторија во пошироката јавност. Во соопштението за медиумите, како една од можностите, тие споменаа паста за заби (за дневна нега) или во форма на специјален гел што би се нанесувал на забот за поцелна поправка.
(Zimo)
