Германскиот бизнис весник „Ханделсблат“ пишува за растечкиот интерес за недвижности во Албанија, Црна Гора и Северна Македонија. Туризмот, ниските цени и перспективата кон ЕУ ги охрабруваат инвестициите и развојот на пазарот.
Во Црна Гора, поранешната тврдина Мамула, позната по својата темна историја, е претворена во луксузен хотел. На албанската ривиера, во близина на Валона, е изграден ексклузивниот комплекс „Зелен брег“, додека во Драч се реализира амбициозен проект за реконструкција на главното пристаниште, вклучувајќи луксузна марина и станбен и угостителски центар, пишува авторот Герд Хибнер во германскиот дневен весник „Ханделсблат“, кој се фокусира на економски прашања.
Тој наведува дека големите хотелски синџири како што се „Хилтон“, „Мариот“ и „Интерконтинентал“ сè повеќе инвестираат во регионот, што се толкува како знак на доверба во неговиот туристички потенцијал. „Списокот на проекти и нови градби во Црна Гора, Албанија и Северна Македонија продолжува“, нагласува „Ханделсблат“.
Текстот нагласува дека промените се видливи и го цитира Ерион Метоја од Albania Immobilien Invest, кој вели: „Пазарот на недвижности во Албанија веќе добро се разви, продажбата се зголеми за трипати до четирипати.“
„Сепак, цените се уште се релативно ниски. Овие пазари се уште се сметаат за скриени бисери на Европа, а земјите стануваат сè попопуларни меѓу туристите“, пишува весникот, наведувајќи дека „во 2024 година, Албанија ќе ја посетат околу 11,7 милиони странски туристи, што е зголемување од 15 проценти во споредба со претходната година. Туризмот во Албанија сочинува околу една четвртина од бруто-домашниот производ (БДП), пишува Handelsblatt и додава дека сличен удел на туризмот во БДП е забележан и во Црна Гора.“
„Економскиот раст е забележлив: оваа година албанската економија треба да порасне за околу 2,4 проценти, во Црна Гора за околу 3 проценти, а во Северна Македонија за 3,2 проценти.“
Во текстот се наведува дека преговорите за пристапување во ЕУ дополнително поттикнуваат оптимизам на пазарот на недвижности во регионот. „Аналитичарите посочуваат паралела со Хрватска, каде што цените на недвижностите пораснаа по пристапувањето во ЕУ.“
Особено во Албанија, инвеститорите се привлечени од „комбинацијата од растечка туристичка побарувачка, ниски почетни цени и ограничена понуда на атрактивни крајбрежни локации“, изјави за Ханделсблат Андреас Герлер, менаџер во „Велинвест Прушке и Калм ГмбХ“. Исто така, се забележува дека „цените на недвижностите во Албанија значително варираат во зависност од локацијата. На север, тие се движат помеѓу 1.000 и 1.500 евра по квадратен метар, додека во јужните туристички центри можат да достигнат 5.000 до 6.000 евра“, вели Метоја.
Во текстот понатаму се наведува дека во Скопје може да се купат нови станови по цена од 1.500 до 2.500 евра по квадратен метар. „Во Црна Гора, во Котор или Добра Вода, становите можат да се најдат во сличен ценовен опсег, додека куќите со базен чинат помеѓу 500.000 и 750.000 евра“, пишува Ханделсблат.
Весникот предупредува дека купувањето недвижен имот во странство не е лесно. „Герлер советува да се избегнуваат независни купувања или онлајн портали: „Секогаш ангажирајте агенција која ги познава законските прописи во земјата и може да обезбеди договори и објаснувања на германски јазик.“
Експертите предупредуваат и на „правни ризици, можни еколошки прописи и недостаток на ликвидност, што може да биде проблем за препродажба“.
„Сепак, оној кој пристапува внимателно и работи со сигурен партнер, не само што може да открие атрактивни дестинации за одмор, туку и да профитира од потенцијалното зголемување на вредноста на недвижностите“, заклучува авторот Герд Хибнер во весникот Ханделсблат.
Фото – Flickr
