Речиси и да нема фрлени отпушоци од цигари на улиците на Стокхолм, а пушачите ретко се гледаат како виткаат цигари меѓу прстите на јавни места. Рестораните го забранија пушењето пред просториите, а терасите на отворените кафулиња се исто така забранети. Правилата се јасни и ретко се кршат – Шведска со тоа стана првата земја „без чад“ во светот.
Сепак, ова не значи дека поранешните пушачи се откажале од никотинот и целосно се свртеле кон здрави навики. Напротив – на големата конференција на British American Tobacco (BAT) во Стокхолм беше откриено дека земјата официјално ги достигнала критериумите за општество без чад, 16 години пред целта на ЕУ (2040).
Во последните 13 години стапката на пушење во Шведска е повеќе од преполовена, главно благодарение на промоцијата на производи без чад како што се снус, никотински кесички и електронски цигари. Денес, само 5,3% од возрасните во Шведска пушат, додека просекот во ЕУ е 24%.
„Покрај намалувањето на бројот на пушачи, Шведска има и најмал број на предвремени смртни случаи од болести поврзани со пушењето во целата Унија. Морталитетот кај мажите од рак на белите дробови тука е за 61% помал од просекот на ЕУ, додека вкупната смртност од болести поврзани со тутунот е за 39,6% помала“, рече Даниеле Тауер, директорка за научни и регулаторни работи во BAT.
Директорот за истражување и наука на BAT, д-р Џејмс Марфи, вели дека 2,6 милиони животи би можеле да бидат спасени во следните 10 години ако пушачите масовно се префрлат на алтернативи на цигарите. BAT инвестираше повеќе од 12 милијарди фунти во истражување во текот на изминатата деценија, а повеќе од 1.700 научници работат на иновации.
Тој истакнува дека производите без чад, како што се уредите за загревање тутун и никотинските кесички, имаат до 99% пониски нивоа на штетни хемикалии од цигарите. Компанијата има за цел да генерира 50% од своите приходи од производи без чад до 2035 година.
Тајната на успехот на Шведска, велат експертите, лежи во комбинација од свест, достапност и прогресивна регулатива. Владата ја промени својата политика – од „намалување на употребата“ кон „намалување на штетата“ – за да го олесни преминот кон помалку штетни алтернативи. Моделот на акцизен данок прилагоден на ризикот ги прави производите без чад попристапни од цигарите.
Денес, само 2% од лицата на возраст од 16 до 29 години во Шведска пушат секојдневно, во споредба со просекот во ЕУ од 15%.
(Bizlife)
