Германската авиокомпанија Луфтханза би можела да намали околу 100 домашни летови неделно следното лето, бидејќи зголемените даноци и аеродромските такси влијаат врз профитабилноста, најави извршниот директор на авиокомпанијата, Карстен Шпор.
„Без намалување на трошоците за водење бизнис во Германија, понатамошните откажувања ќе бидат неизбежни“, изјави Шпор за весникот Велт ам Зонтаг, додавајќи дека се разгледуваат рутите од Минхен до Минстер-Оснабрик и Дрезден, каде што компанијата моментално работи со загуба.
Тој истакна дека од 2019 година, државните трошоци за бизнис во авијацијата во Германија речиси се дуплирале.
Според него, високите даноци најмногу влијаат на билетите во економска класа, додека стапките на зафатеност во повисоките класи се зголемуваат, објави Блумберг.
Германските авиокомпании долго време предупредуваат за високите аеродромски такси.
Рајанер оваа недела објави намалување на зимскиот капацитет во Германија за 800.000 седишта и откажување на 24 рути од истите причини.
„Луфтханза“, која се бори да се опорави од падот на профитот, планира да намали околу 4.000 административни работни места до 2030 година. Во меѓувреме, нејзината нискобуџетна подружница „Дискавер“ планира да ја прошири својата флота за 10 авиони, вклучувајќи четири „А350-900“, за да ја зголеми ефикасноста на летовите на долги релации.
Фото – Flickr
