Додека технолошките гиганти инвестираат милијарди во развој на вештачка интелигенција и натрупуваат долгови, конгломератот на Ворен Бафет оди во спротивна насока – broi рекордна сума готовина од дури 382 милијарди долари, што е повеќе од Apple, Microsoft и Alphabet заедно.
На Вол Стрит, вообичаена мерка за моќ е колку пари компанијата има на својата сметка. И додека светот се восхитува на огромните парични резерви на најголемите технолошки фирми, Berkshire Hathaway ги надмина сите. Во третиот квартал од 2025 година, компанијата на Бафет забележа историски максимум – дури 382 милијарди долари готовина на билансот на состојба.
Оваа бројка не само што ги надминува сите претходни рекорди, туку и паричните резерви на трите најголеми технолошки фирми заедно. И ова значи дека наследникот на Бафет, Грег Ејбл, кој ќе ја преземе кормилото во 2026 година, ќе има вистинска планина од пари – буквално „Монополски капитал“ – на располагање за идни аквизиции и инвестиции.
За разлика од технолошките гиганти кои влегуваат во најголемиот инвестициски циклус во последниве децении, Беркшир Хатавеј одржува конзервативна политика и чека вистински момент. Компании како Apple, Microsoft, Amazon и матичната компанија на Google, Алфабет, планираат да потрошат над половина трилион долари оваа година за изградба на инфраструктура за вештачка интелигенција, финансирајќи ги тие проекти – сè повеќе – преку долг.
Сепак, Ворен Бафет останува претпазлив. „Бафет е очигледно згрозен од моменталните пазарни проценки“, рече Џонатан Овен од Twenty Four Asset Management, кој управува со 30 милијарди долари средства. „Во исто време, постои зголемен отпор кон плановите за енормно инвестирање во вештачка интелигенција“, додава тој.
Иако Беркшир не е единствениот корпоративен гигант со огромни резерви, неговиот пристап е различен. Додека другите компании трошат пари за откуп на сопствените акции, Беркшир не го сторил тоа пет последователни квартали.
Во свет кој ги величи маратоните за трошење и инвестирање, „Беркшир Хатавеј“ покажува дека вистинската моќ лежи во трпението и ликвидноста. Додека другите брзаат да трошат, империјата на Бафет знае дека парите – кога се користат во вистинско време – можат да вредат многу повеќе од кој било футуристички проект.
(Investitor)
Фото – Flickr
