Средношколските професори во Грција наскоро ќе поминат интензивна обука за користење на алатки за вештачка интелигенција, бидејќи земјата презема водечка улога во вклучувањето на вештачката интелигенција во својот образовен систем. Оваа недела персоналот во 20 училишта ќе биде обучен за специјализирана верзија на ChatGPT, адаптирана за академски институции, како дел од новиот договор меѓу грчката влада и OpenAI, објавува The Guardian.
„Мораме да прифатиме дека вештачката интелигенција не постои во паралелен универзум. Таа е тука“, изјави министерката за образование, Софија Захаракис, пред пилот-програмата.
Иницијативата, која ќе се прошири низ целата земја во јануари, ја прави Грција една од првите земји што воведуваат генеративна вештачка интелигенција во училниците.
Работилниците првично ќе се фокусираат на запознавање на наставниците со новата технологија за да помогнат во планирањето на часовите, истражувањето и персонализираното учење, пред ChatGPT Edu постепено да се интегрира во училиштата. Следната пролет, кога учениците од средните училишта ќе можат да ја користат алатката, пристапот ќе биде строго контролиран, изјавија официјални лица.
Владата на грчкиот премиер Киријакос Мицотакис има амбиции да ја направи Грција технолошки центар, а Атина ќе биде домаќин на една од првите фабрики за вештачка интелигенција во Европа. Додека Мицотакис предупреди на значајни социјални немири ако револуцијата на вештачката интелигенција се гледа исклучиво како средство за збогатување на технолошките компании, неговата администрација е меѓу првите што изработи национална стратегија за подготовка на Грците за сите примени на оваа технологија.
Во училиштата каде што повеќето ученици користат апликации како ChatGPT, владата се води од принципот „ако не можеш да го победиш ботот, спријатели се со него“.
(Euronews.rs)
(фото: Needpix)
