Сателит кој ќе гледа во внатрешноста на облаците за да направи попрецизни временски прогнози и климатски предвидувања беше лансиран во вселената вчера. Сателитот EarthCARE полета со ракетата Falcon 9 на SpaceX од вселенската база Ванденберг во Калифорнија.
Тој ќе им помогне на научниците да разберат каква улога играат облаците и аеросолите како што се прашината и чадот во загревањето и ладењето на атмосферата на Земјата. Сателитот ќе ја мери и радијацијата што ја емитува планетата.
Податоците од EarthCARE (Earth Cloud Aerosol and Radiation Explorer) би можеле да помогнат во ублажувањето на заканите од глобалното затоплување, велат експертите. Сателитот е дело на професорот Ентони Илингворт од Универзитетот Рединг, кој го дизајнираше пред повеќе од 30 години.
Проектот беше прифатен од Европската вселенска агенција (ESA) во 2004 година, а подоцна стана заедничка мисија со јапонската вселенска агенција Jaxa.
Облаците играат витална улога во контролирањето на температурата на планетата со тоа што ја рефлектираат сончевата светлина назад во вселената и ја задржуваат топлината. Но, малку е познато како тие управуваат со климатскиот систем на Земјата.
Се очекува дека тригодишната мисија, која чини повеќе од 800 милиони евра, ќе даде одговор на некои од овие прашања.
Сателитот тежи нешто повеќе од два тона и е долг нешто повеќе од 17 метри. На него има четири инструменти кои детално ќе ги анализираат структурите на облаците, ќе фотографираат и ќе мерат колку топлина од Сонцето е заробена од облаците.
Откако ќе биде лансиран, EarthCARE ќе орбитира околу Земјата на секои 90 минути на надморска височина од околу 400 километри.
(24sata)
(фото: Flickr)
