Обемот на работа од дома во Германија се уште е на високо ниво неколку години по пандемијата на коронавирус, иако во споредба со претходните години е во благ пад, објави во средата Федералниото биро за статистика во Визбаден.
Во 2023 година 23,5% отсто од вработените работеле од дома целосно или делумно, што е мало намалување во однос на претходните години, се наведува во соопштението на Федералното биро за статистика. Конкретно е намален бројот на оние кои секојдневно работат дома.
Во споредба со периодот пред пандемијата, уделот на вработени кои работат од дома е двојно зголемен. Во март 2022 година заврши обврската на работодавците да овозможат работа од дома, секогаш кога е можно да се усогласи со работните процеси.
Најголем процент од оние кои работат од дома е забележан во ИТ секторот, при што речиси 75% од вработените работат од дома целосно или делумно. Сличен висок процент е забележан и во секторите администрација, осигурување и бизнис консалтинг.
Најмал процент е забележан во здравствениот сектор, каде што само 6,4% од вработените повремено работеле од дома. Слично низок процент бележи и малопродажбата и градежништвото.
Работата од дома најмногу ја користеле помладите вработени од возрасната група од 25 до 44 години, што аналитичарите го поврзуваат со можноста за грижење за децата.
Со овие статистики на работа од дома, Германија е на средината на рангирањето во споредба со другите членки на ЕУ. Во рамките на Европската унија работата од дома најмногу ја користат Холанѓаните, Швеѓаните и Финците, а најмалку Бугарите, Романците и Грците.
Во долниот дел на рангирањето е и Хрватска по бројот на вработени кои работат од дома.
(Dnevnik.hr)
(фото: Flickr)
