Канадската влада објави дека воведува царина од 100 отсто за увоз на електрични возила од кинеско производство, за што претходно одлучија САД. Премиерот Џастин Трудо, исто така, најави дека Канада ќе воведе царина од 25 отсто на кинескиот увоз на челик и алуминиум.
„Актерите како Кина избраа да си дадат неправедна предност на глобалниот пазар“, рече Трудо на состанокот на владата во Халифакс, Нова Шкотска. Владата на Трудо започна 30-дневни консултации за ова прашање летово со цел да се спротивстави на „јасниот напор на кинеските компании да го преплават глобалниот пазар со понуда“.
Потегот на Канада доаѓа неколку недели откако и САД и Европската комисија објавија зголемени царини за увоз на кинески електрични возила, а советникот за национална безбедност на американскиот претседател Џејк Саливан ја охрабри Канада да го стори истото.
Од електричните возила од кинеско производство, единствени кои моментално се увезуваат во Канада се оние од Tesla, кои се произведуваат во фабриката на компанијата во Шангај. Во моментов во Канада не се продаваат или увезуваат електрични возила од кинеска марка.
Извор: Бета
Фото – Pxhere
