Скопје денеска и утре (12 и 13 октомври) ќе биде домаќин на Skopje Tattoo Show 2024, настан што ќе ги обедини најдобрите тату артисти од Македонија, регионот и пошироко. Второто издание на оваа уникатна тату конвенција ќе се одржи во Skopje Event Center, каде што во текот на два дена ќе се слави различноста, креативноста и уметничкото изразување преку тетовирањето, со што главниот град ќе се претвори во платно на креативноста, индивидуалноста и страсната уметност на тетоважите.
На годинашната интернационална конвенција за тетовирање ќе гостуваат повеќе од 50 познати домашни и странски тату артисти, а посетителите ќе имаат можност да видат како тату уметниците ги претвораат телата во вистински уметнички дела на кожата. Со свои уникатни стилови и техники, артистите ќе креираат неверојатни тетоважи, од реалистични портрети до апстрактни дизајни, претставувајќи го својот креативен потенцијал.
Skopje Tattoo Show 2024 ќе им понуди на посетителите и единствена можност да бидат сведоци на живи перформанси на некои од најдобрите тату артисти од светската сцена, кои ќе ги демонстрираат своите вештини и креативни способности пред публиката. Освен тетовирањето, програмата ќе биде збогатена и со одржување на работилници, семинари, воркшопови, панел дискусии и демонстрации во живо. Овие активности ќе овозможат интеракција помеѓу публиката и уметниците, создавајќи уникатна атмосфера за учење и размена на искуства.
Овој настан претставува и одлична можност за сите кои размислуваат да се тетовираат, бидејќи ќе можат лично да се консултираат со професионалци и да се запознаат со најновите трендови во светот на тетоважите. Skopje Tattoo Show не е само настан за тетоважи, туку претставува еден вид празник на уметноста, индивидуалноста и креативноста.
Skopje Tattoo Show ќе има и натпреварувачки карактер, а жирито составено од реномирани експерти ќе додели награди за најдобрите тетоважи во повеќе различни категории. Покрај тетовирање, конвенцијата ќе биде збогатена и со музички настапи, за кои ќе бидат задолжени THCF, Fire Show, Sarah Mace, Mario Arsov, Oky Doky, Soul Case, Bazel, Mongo & Omaru, Vaso, Chvare, Shorty P, Flooder и Pole People.
