Технологијата на транспарентни соларни ќелии овозможува смартфоните да се полнат директно од сончева светлина, а истражувачки тим од Универзитетот за наука и технологија во Улсан (UNIST) во Јужна Кореја претстави иновација која ја користи сончевата енергија преку екраните на телефонот и другите проѕирни површини.
Под раководство на професорот Квањонг Сео, тим од Одделот за енергија и хемиско инженерство на UNIST разви иновативни проѕирни соларни ќелии (TSCs), кои овозможуваат директно полнење на уредите преку сончева светлина.
Оваа технологија користи проѕирни површини, како стакло на згради, автомобили или екрани на мобилни уреди, за да генерира енергија. Ова значи дека екраните на паметните телефони ќе можат да служат како извор на енергија, овозможувајќи им да се полнат едноставно со изложување на сонце.
Досега најголемиот предизвик во развојот на проѕирните соларни ќелии беше нивниот неестетски изглед – видливите метални жици и непроѕирните елементи ја попречуваа функционалноста и дизајнот на уредот.
Сепак, тимот на UNIST го реши овој проблем со воведување на технологија наречена „all-back-contact“ (ABC), каде што сите електрични контакти и компоненти се наоѓаат на задната страна на соларната ќелија. Овој иновативен пристап им овозможува на ќелиите да бидат целосно транспарентни, без да се нарушува визуелниот изглед на стаклените површини, а во исто време одржува висока ефикасност во претворањето на сончевата енергија во електрична енергија.
„Овој дизајн на ABC овозможува постигнување високи перформанси во комбинација со естетски решенија, што е од клучно значење за примената на соларните ќелии во секојдневните уреди“, објаснува професорот Сео.
(Web Mind)
(фото: Wikimedia )
