Купувањето куќа во Европа зависи од тоа во која земја живеете. Неодамна објавениот извештај ги спореди цените на имотот со бројот на просечни месечни плати потребни за нивно исплатување, откривајќи огромни разлики меѓу земјите. Според истражувањето на платформата BestBrokers.com, Данска е земјата во која најбрзо можете да си дозволите куќа во Европа.
Тие ги анализираа цените на недвижностите, просечните нето-месечни примања, инфлацијата и реалните каматни стапки на станбените кредити, кои го земаат предвид влијанието на инфлацијата, во 62 земји во светот.
„Со оглед на тоа што цените и приходите значително се разликуваат од земја до земја, тимот на BestBrokers одлучи да го разгледа пазарот на недвижности преку бројот на плати потребни за купување куќа во различни европски земји“, се вели во извештајот.
Во анализата не се земени трошоците за храна, сместување, грижа за деца и други трошоци, но пресметката е теоретска. Резултатите покажуваат дека просечната цена на куќа од 100 квадратни метри во Данска е еквивалентна на 114 просечни плати, што ја прави најприфатлива земја во Европа за купување недвижен имот.
Парадоксално, во 2023 година Данска беше и најскапата земја во ЕУ според трошоците за живот, со цени на стоки и услуги 43% над просекот на ЕУ, покажуваат податоците на Евростат. Сепак, годишните просечни приходи во Данска се седми највисоки во Европа, што им овозможува на граѓаните поголема куповна моќ.
Ирска и Шведска се на второто и третото место на листата со најприфатливи земји, со 123 и 129 нето плати потребни за купување куќа од 100 квадратни метри. Ова е еквивалентно на приближно 10 години просечна годишна заработка, пишува Euronews.
На дното на европската листа се БиХ, Црна Гора, Словенија, Чешка и Словачка. Во Словачка просечната цена на куќа од 100 квадратни метри достигнува дури 297 просечни плати, што е речиси 25 години работа. Кога некој би можел да заштеди половина од својата нето плата, сепак ќе му требаат дури 50 години заштеда за семеен дом.
Најприфатлива земја во светот за купување куќа во однос на приходите е Јужна Африка, каде што за куќа од 100 квадратни метри се потребни 71 просечна плата. На второ место се САД, со 76 просечни плати, што е приближно шест години годишен приход. Цените на недвижностите во САД, сепак, значително варираат од држава до држава. На самото дно на светската листа е Непал, каде што за купување куќа се потребни 684 просечни плати. Турција е веднаш зад него, со 631 плата – што е еквивалент на повеќе од 52 години заработка.
(Bizlife, BestBrokers.com)
(фото: Pixabay)
