Пиењето кафе наутро може да има повеќе здравствени придобивки отколку да го пиете во текот на денот, според новото истражување кое го објави германската новинска агенција dpa.
Истражувачите сакале да видат дали времето од денот кога луѓето пијат кафе влијае на нивното здравје. Тие проучувале повеќе од 40.000 возрасни лица во САД како дел од долгорочни студии кои се однесуваат на здравјето, исхраната и начинот на живот.
Откриле две различни шеми на пиење кафе: оние кои пијат кафе наутро и оние кои го пијат во текот на денот. Повеќе од една третина (36%) од учесниците пиеле кафе наутро, а 14% од нив го пиеле во текот на денот.
Тим од истражувачи предводени од експерти од Универзитетот Тулејн во САД ги набљудувале учесниците речиси десет години. За време на следењето 4.295 учесници починале. Откако зеле предвид различни фактори, истражувачите откриле дека луѓето кои пијат кафе наутро имаат 16% помали шанси да умрат од оние кои воопшто не пијат кафе. Тие, исто така, имале 31% помала веројатност да умрат од срцеви заболувања. За луѓето кои пиеле кафе во текот на денот немало намалување на ризикот во споредба со оние кои не пиеле кафе.
Пиењето кафе наутро може да биде посилно поврзано со помал ризик од смртност отколку пиењето кафе подоцна во текот на денот, напишаа истражувачите во European Heart Journal.
Водечкиот автор на студијата, Лу Чи од Универзитетот Тулејн, вели: „Досегашните истражувања покажуваат дека пиењето кафе не го зголемува ризикот од кардиоваскуларни болести и се чини дека го намалува ризикот од некои хронични болести како што е дијабетес тип 2“.
“Со оглед на ефектите што кофеинот ги има врз нашите тела, сакавме да видиме дали времето од денот кога пиете кафе влијае на здравјето на вашето срце. Нашите откритија сугерираат дека не е важно само дали и колку пиете кафе, туку и времето од денот кога го пиете. Ние обично не даваме совети за времето во нашите препораки за исхрана, но можеби ќе треба да го разгледаме ова во иднина“, додава тој.
Тој нагласува дека ова истражување не открива зошто пиењето кафе го намалува ризикот од смрт од кардиоваскуларни болести. Можно објаснување е дека пиењето кафе во попладневните часови може да го наруши деноноќниот ритам и нивото на хормони како мелатонин. Ова, пак, води до промени во кардиоваскуларните ризик фактори како што се воспалението и крвниот притисок.
(Zimo)
