Постарите возрасни лица кои консумираат незасладено кафе со кофеин може да го намалат ризикот од деменција, открива нова студија. Сепак, заштитниот ефект не се однесува на консумација на засладено кафе или кафе без кофеин.
Научниците од институциите низ Кина ги анализираа здравствените податоци од 204.847 учесници во Велика Британија на возраст од 40 до 69 години. Во текот на просечното следење од девет години тие ги испитувале начините на консумирање кафе и дијагнозите за деменција.
Поголемиот внес на кафе со кофеин, особено незасладеното, е поврзано со намален ризик од Алцхајмерова болест и деменција, како и од Паркинсонова болест. Не е забележана таква асоцијација со кафе засладено со шеќер или вештачки засладено кафе, истакнуваат авторите на студијата, објавена во American Journal of Clinical Nutrition.
Учесниците биле поделени во пет групи врз основа на нивниот внес на кафе: тие што не пијат кафе, тие што пијат 0-1 шолја дневно, тие што пијат 1-2 чаши, тие што пијат 2-3 чаши и тие што пијат повеќе од 3 шолји дневно. Најголемо намалување на ризикот е забележано кај оние кои консумирале повеќе од три шолји дневно. Потрошувачите на која било количина кафе имале најмалку 34% помали шанси да развијат Алцхајмерова болест, 37% помали шанси да развијат Паркинсонова болест и 47% помали шанси да умрат од неуродегенеративна болест во споредба со оние кои не пијат кафе.
Студијата го нагласува кофеинот како потенцијален заштитен агенс против деменција. Авторите на студијата шпекулираат дека шеќерот и вештачките засладувачи би можеле да ги негираат придобивките од кофеинот, но потребни се дополнителни истражувања за ова.
Повеќе механизми сугерираат потенцијална врска меѓу консумирањето незасладено и кафе со кофеин и неуродегенеративните болести, напишаа тие.
И покрај овие резултати, каузалноста сè уште останува нејасна, бидејќи факторите како раната деменција што ги менува навиките за кафе или други непознати променливи може да бидат во игра.
Претходните студии, исто така, го поврзуваат кафето со забавувањето на когнитивниот пад и продолжување на животот, но ефектот може да зависи од количината што се консумира и времето. Додавањето шеќер или вештачки засладувачи во кафето може да има штетни ефекти и треба да се пристапи со претпазливост, советуваат на крајот авторите на студијата.
(Science Alert)
(фото: Hippopx)
