Една од водечките компании во областа на вештачката интелигенција, OpenAI, која го развива ChatGPT, регистрираше 400 милиони неделни активни корисници во февруари. Тоа е за 33% повеќе отколку во декември, откри главниот оперативен директор на OpenAI, Бред Лајткап, во интервју за американскиот деловен медиум CNBC.
Компанијата со седиште во Сан Франциско, исто така, објави дека бројот на деловни корисници е двојно зголемен – на 2 милиони во споредба со септември, што укажува на брзото усвојување на алатки за вештачка интелигенција во бизнис секторот. OpenAI не ги даде најновите податоци за бројот на претплатници на своите услуги Plus и Pro, за кои е потребна месечна претплата од 20 и 200 долари, соодветно.
Најновите бројки доаѓаат кога OpenAI се соочува со новиот кинески конкурент DeepSeek. Компанијата, исто така, неодамна отфрли понуда за преземање од речиси 100 милијарди долари од милијардерот и соосновач на OpenAI Илон Маск и група инвеститори.
OpenAI во моментов е во преговори со јапонскиот инвестициски гигант Softbank за потенцијална инвестиција од 40 милијарди долари, според CNBC, која би можела да ја процени компанијата на околу 300 милијарди долари.
OpenAI се здоби со глобално признание во 2022 година со лансирањето на популарниот чет-бот за вештачка интелигенција ChatGPT. По успехот на ChatGPT на пазарот се појавија неколку конкуренти. Меѓу другото, компанијата на Маск, xAI, ја претстави најновата верзија на својот chatbot Grok, а кинескиот DeepSeek го претстави моделот DeepSeek-R1 на крајот на јануари.
На почетокот на месецот светлината на денот ја виде и роботот за разговор Le Chat од француската компанија Mistral AI.
OpenAI, AI.
(Bizlife)
(фото: Freepik)
