Гувернерот на Калифорнија го предложи ликот на основачот на Apple како дизајн за нова комеморативна монета, од серијата на оние посветени на американските иноватори. Целта е да се прикаже државата како лулка на иновациите.
Од 2018 година ковачницата имплементира програма за производство на комеморативни монети од 1 долар, кои ги слават американските иноватори. Според оваа програма, секоја од сојузните држави може да предложи создавање на единствена монета, која ќе биде посветена на иновација или иноватор од тоа поле. Според тоа, гувернерот на Калифорнија, Гевин Њусом, минатата недела го номинираше ликот на Стив Џобс, технолошки иноватор, претприемач, соосновач на Apple и Pixar, за новата калифорниска монета за иновации.
„Иновацијата и Калифорнија се синоними, а Стив Џобс ја сумира уникатноста на иновациите врз кои е изградена Калифорнија: иновација која не е само поттикната од бизнисот, туку како средство за да се промени светот засекогаш“, истакнува Њусом во својот предлог, сакајќи да испрати порака дека неговата држава е лулка на технолошките иновации во светот.
Во објаснувањето се наведува дека Џобс бил визионер во повеќе индустрии и лансирал голем број значајни производи како што се компјутерите на Apple и iPhone, но го објавил и првиот целосно компјутерски анимиран филм, „Toy Story“. Целта на сето тоа е, според зборовите на Џобс, „да се премости јазот меѓу софистицирана технологија и останатите од нас, кои го сочинуваат мнозинството од човештвото… да се направи сложената технологија едноставна и забавна за употреба“.
Овој пристап, велат тие, доведе до тоа iPod, iPhone и iPad да бидат уреди кои ги редефинираа постоечките технологии и ги направија попрецизни, интуитивни и функционални. Пристапот на Џобс кон иновациите, она што им користи и ги поврзува луѓето, се заснова на желбата да се испробаат нови идеи и да се поместат границите на она што е можно – пристап што го отелотворува духот на Калифорнија, заклучува Њусом.
„Калифорнија има чувство за експериментирање и чувство за отвореност за тоа – отвореност и нови можности – што навистина не ги ценев додека не отидов на други места“, рече еднаш Стив Џобс, цитат што совршено се вклопува со предлогот да се овековечи неговиот имиџ на паричката од еден долар.
По оваа номинација, дизајнот на монетата сè уште треба да биде одобрен од федералната влада, а потоа Ковачницата на САД ќе започне со ковање на монетата. Изработката треба да започне во 2026 година.
(Bug.hr)
(фото: Canva)
