Google планира да го искористи Холивуд за да ја зголеми својата популарност меѓу младите и да ги направи своите производи „кул“. Технолошкиот гигант тивко започна со нова филмска и телевизиска иницијатива наречена „100 zeros“, дознава Business Insider.
Проектот е повеќегодишно партнерство со продукциската куќа Range Media Partners, позната по филмовите како A Complete Unknown и Longlegs. Заедно со Range, Google планира да инвестира во играни и документарни филмови, како и во серии – да ги доближи своите технологии до младите преку забавна содржина.
Покрај поддршката на креативната заедница, Google гледа на „100 zeros“ како на начин да ги промовира своите технолошки производи, вклучувајќи ги и Immersive View (3D приказ), алатките за просторно мапирање и се разбира, вештачката интелигенција.
Иако целта не е агресивно пласирање производи, Google не би имал ништо против ликовите во филмовите кои користат телефони со Android наместо iPhone – се додека тоа изгледа природно. Дополнително, компанијата веќе има посебна маркетинг програма во соработка со United Talent Agency, преку која го промовира телефонот Pixel во проекти како The White Lotus и Wicked.
Google дискретно го тестираше пристапот минатата година со финансирање на независниот хорор филм „Cuckoo“, продуциран од студиото Неон. Логото „100 zeros“ беше прикажано во почетните кредити, без јавна промоција. Филмот беше наменет за публиката на Gen Z.
Неодамна, Google и Range го најавија проектот „AI On Screen“, со кој сакаат да поддржат кратки филмови за вештачката интелигенција – со цел двете идеи да се развијат во долгометражни филмови. Еднa од нив, „Sweetwater“, се занимава со наследството на славните и улогата на вештачката интелигенција во личната историја.
Во САД, иако Android доминира на глобалниот пазар, Apple iPhone сè уште има јасна предност кај младите. Една студија покажа дека дури 88% од американските тинејџери користат iPhone. iPhone е присутен во популарните серии и филмови како Succession и Knives Out, додека Android често останува на страна. Google сака да го промени тоа, но не преку директно рекламирање, туку преку суптилно присуство во квалитетните приказни што ги поддржува.
Интересно е што Google не планира да го користи YouTube како главна платформа за дистрибуција на оваа содржина. Иако YouTube стана главна ТВ платформа, „100 Zeros“ нема да се обиде да го рекреира неуспешниот проект YouTube Originals. Наместо тоа, целта е да се продаде содржина на традиционални студија и стриминг услуги како Netflix.
(Business Insider)
(фото: Pixabay)
