Минатата недела пратениците му испратија на гувернерот на Тексас, Грег Абот, предлог-закон во Сенатот 2420, за кој ќе биде потребна проверка на возраста и задолжителна родителска согласност пред да му се дозволи на малолетникот да преземе или да купи софтверски апликации.
Законот веќе е усвоен со двопартиска поддршка во Претставничкиот дом, а сенатската комисија, исто така, ја посочи својата поддршка.
Новиот предлог за измена на тој закон ќе им забрани на малолетниците (помлади од 18 години) да создаваат сметки на платформи за социјални медиуми како Twitter, TikTok, Snapchat, Facebook и други, и ќе бара од корисниците да ја потврдат својата возраст, при што компаниите за социјални медиуми ќе мора да ја почитуваат забраната до април 2026 година.
Минатата недела сенаторите во Комитетот за државни прашања слушнаа изјави од многу тинејџери, кои им рекоа дека целосната забрана на социјалните мрежи за сите помлади од 18 години не е решение. Наместо тоа, многумина предложија намалување на старосната граница на 16 години.
Штетната содржина на која младите се изложени на интернет не исчезнува кога ќе наполнат 18 години. Законот ги остава младите возрасни луѓе во дигиталниот свет без системите за поддршка што ги имале како малолетни, што може да има сериозни последици за менталното здравје, велат тинејџерите.
Тинејџерите им укажаа на законодавците дека голем дел од нивните животи и кариери се испреплетени со социјалните медиуми. Тие брзо добија одговор од сенаторот Адам Хинојоса, републиканец од Корпус Кристи, кој беше ко-спонзор на законот.
„Ако ова беше идеален свет, би можеле да го правиме она што го кажувате. Но, јасно е дека платформите на социјалните мрежи го прават токму она од што јас се плашам. И имаме безброј истражувачки приказни за врсници на ваша возраст кои извршиле самоубиство и биле жртви на малтретирање“, рече Хинојоса.
(Zimo)
