Австралија ќе стане првата земја во светот што ќе воведе целосна забрана за користење на YouTube од страна на деца, поради загриженост за изложеност на штетна содржина. Ваквата одлука доаѓа откако владата одлучи да ја укине досегашната изземеност на YouTube од регулативите за социјални мрежи.
Одлуката следи по истражување на австралискиот регулатор, кое покажало дека дури 37% од децата на возраст меѓу 10 и 15 години гледале штетна содржина на оваа видео-платформа — што е највисок процент во споредба со другите дигитални мрежи.
Други технолошки компании, како Facebook, Instagram, Snapchat и TikTok, веќе подолго време изразуваат незадоволство поради изземеноста на YouTube од строги правила, сметајќи дека тоа ја нарушува фер конкуренцијата.
„Нема сомнеж дека онлајн платформите имаат негативно влијание врз австралиските деца“, изјави премиерот Ентони Албанезе. „Социјалните мрежи им нанесуваат штета на нашите најмлади, и како влада, сакаме родителите да знаат дека сме тука да им помогнеме.“
Новата законска рамка, која ќе стапи во сила во декември 2025 година, предвидува високи казни до 32,2 милиони австралиски долари за секоја платформа што ќе ја прекрши регулативата. Законот првично беше усвоен уште во ноември минатата година, но изземеноста на YouTube беше оставена како отворено прашање — сè до сега.
YouTube веќе реагираше на најавата од Канбера. Портпарол на компанијата во писмено соопштение нагласи дека платформата не се смета за социјална мрежа, туку за отворена видео-платформа која нуди слободен пристап до квалитетна содржина.
„Го споделуваме истиот стремеж со владата — да се намали штетата од интернетот. Сепак, YouTube е медиум за видео-споделување, а не социјална мрежа“, стои во одговорот на компанијатa.
Фото – Pexels
