Постои тој момент некаде помеѓу доцниот неделен ручек и вечерните вести кога сè запира и започнува чувство на нелагодност. Не е паника, не е дури ни вистинска тага, повеќе е како притисок во градите, тивка нервоза во стомакот, мисла што не може да се артикулира, но знаеме дека значи: утре е понеделник.
Во современиот деловен свет, ова чувство има име – Sunday Scaries или „неделна анксиозност“. И не е резервирано само за оние на кои не им се допаѓа работата. Напротив, сè e почеста дури и кај луѓето кои инаку функционираат совршено, кои се дури и задоволни од своето работно место. Но, кога ќе дојде неделна вечер, наместо одмор – се појавува отпор.
Според истражувањата, повеќе од 70% од вработените ширум светот признаваат дека редовно чувствуваат некаков вид на нелагодност пред почетокот на новата работна недела. Не е нужно класична анксиозност – туку ментален премин од состојба на релаксација во „работен режим“. И таа транзиција станува сè потешка бидејќи границите помеѓу работата и приватниот живот се замаглуваат.
Понеделникот порано беше почеток – денес е продолжение. Пораките пристигнуваат во недела, е-поштата се проверува „на пат“, а мозокот веќе не знае ни кога завршува работната недела. Затоа, неделните вечери сè повеќе личат на тивкиот понеделник во најавата.
Добрата вест: постојат начини да се ублажи, ако не и целосно да се избегне неделната анксиозност. Клучот не е во големите промени, туку во малите ритуали што го враќаат чувството на контрола и безбедност.
Планирајте нешто убаво за понеделник – и нека биде приватно, а не деловно. Вашето омилено кафе, прошетка до работа, појадок надвор од куќата.
Не ја оставајте неделата за да „надоместите“ сè што не сте направиле во текот на неделата. Неделата не е ден за мултитаскинг, туку за ресетирање.
Воведете неделни рутини кои немаат никаква врска со работата: читање, готвење, гледање серија без да гледате во телефонот.
Исклучете ги известувањата барем неколку часа. Можеби нема да можете да ги контролирате утрешните е-пораки – но можете да го исклучите звукот на телефонот вечерва.
Затоа што неделната вечер не мора да биде вовед во стрес. Може да биде мост до понеделник, а не предупредување.
(Bizlife)
