Во јули годинава 48 студенти влегоа низ вратите на Медицинскиот факултет „Алис Л. Волтон“ во Бентонвил, Арканзас, за да станат првата генерација на факултетот, учејќи нов, но различен вид медицина.
Некои дојдоа од блиските градови, други од урбаните центри во Мичиген и Њујорк. Речиси сите имаа избор каде ќе станат доктори, но решија да му дадат шанса на новиот факултет поради неговиот уникатен пристап кон преиспитување на медицинското образование.
Факултетот, именуван по својата основачка – најбогатата жена во светот и наследничка на богатството на Wallnart – ќе ги обучува студентите на радикално поинаков начин од повеќето традиционални медицински факултети во текот на следните четири години.
Наместо да ги учи младите лекари да бркаат симптом по симптом и да прават тест по тест, Алис Волтон сака дипломците на нејзиното училиште да ги одржуваат пациентите здрави практикувајќи нешто што повеќето лекари денес не го приоритизираат: превентивна медицина и принципите на холистичко здравје, што вклучува грижа за целата личност (не само третман) и сите фактори – од ментално здравје до услови за живот и избор на начин на живот – кои придонесуваат за благосостојба.
Секако, ова не се нови идеи, но традиционалната медицина во голема мера им посветила само формално внимание. Експертите истакнуваат дека иако дури 80% од медицинското образование се фокусира на биологијата, околу 60% од предвремените смртни случаи се предизвикани од фактори на однесување, вклучувајќи ги и навиките на живот како што се исхраната, вежбањето и пушењето.
Визуелно, училиштето го исполнува својот акроним: AWSOM. Зградата, со своите импозантни стаклени ѕидови, се наоѓа на земјиштето на семејството Волтон и вклучува не само студио за велнес и теретана, туку и парк на покривот, медицински градини каде што учениците можат да учат, градини за одгледување здрава храна и рефлективно езерце. Патека од паркот на покривот води низ шумата Озарк директно до Музејот на американска уметност „Кристал Бриџис“, кој Волтон го изгради во 2011 година за да ги потсети учениците на врската помеѓу лекувањето, уметноста, науката и човештвото.
Волтон ги покрива школарините за првите пет генерации дипломирани студенти. За својата инвестиција, таа очекува некои од новопечените лекари да го пренесат она што го учат во локалната заедница – особено во недоволно опслужените области на Арканзас, нејзината матична држава. Но, нејзината поширока визија е моделот да се реплицира на други медицински факултети низ целата земја – така што она што започна во северозападен Арканзас може да се прошири во други региони со малку здравствени ресурси.
Отворањето на нов медицински факултет во 2025 година не е ниту лесен ниту очигледен потфат, особено кога мисијата е редизајнирање на медицинското образование..
Но, сопственото искуство на Волтон како пациент ја постави на овој пат. По сериозна сообраќајна несреќа во 1980-тите години, таа се бореше со инфекција на коските, повеќекратни операции и долгорочни здравствени проблеми повеќе од една деценија. Волтон се убеди дека “здравствениот систем е расипан“ и дека некој мора да започне промена.
Околу 2.000 студенти аплицираа за 48-те места на факултетот, а многу од избраните имаа интерес да обезбедат здравствена заштита на недоволно опслужените региони, особено Арканзас.
Иако Организацијата за акредитација на медицинските училишта препорачува наставните програми да вклучуваат најмалку 25 часа едукација за исхрана, повеќето училишта во просек имаат околу 20 часа, а во некои случаи тие часови се само изборни предмети.
Наставната програма на AWSOM моментално вклучува повеќе од 50 часа обука поврзана со исхраната, вклучително и часови по кулинарство.
(Bizlife)
(фото: Flickr)
