Денес можете да купите ладно пиво на киоск, во продавница или на бензинска пумпа во секоја земја во регионот, но наскоро тоа повеќе нема да биде можно во Хрватска.
Оваа земја ќе воведе ограничувања за продажба на ладни алкохолни пијалоци без посебна дозвола од градот или општината.
Според хрватските медиуми, Министерството за економија планира да го измени Законот за трговија до крајот на годината, што ќе им овозможи на локалните власти да воведат значителни ограничувања за продажба на ладни алкохолни пијалоци. Според првичните информации, градовите и општините ќе добијат право да одредат во кои објекти и во кое време може да се продаваат вакви пијалоци.
Туристичките одморалишта или градовите што имаат проблеми со целодневната консумација на алкохол би можеле да ја забранат продажбата по 17 часот или во некое друго време.
– Градските центри повеќе нема да изгледаат како што изгледаат ноќе, поради пијанство. Ваквите купувања не се можни ниту во некои други земји. На пример, во Австрија не можете да купите алкохол на киоск или бензинска пумпа во скијачки центар – изјави соговорник на хрватскиот портал 24 сата од Министерството за економија.
(Politika)
Фото – Flickr
