OpenAI планира да инвестира околу 400 милијарди долари во развој на пет нови локации на центри за податоци во САД, во партнерство со Oracle и SoftBank, што е најголемиот напор досега во исполнувањето на претходното ветување за трошење половина трилион долари за инфраструктура за вештачка интелигенција во земјата.
Новите локации, распоредени низ Тексас, Ново Мексико и Охајо, ќе имаат вкупен капацитет од седум гигавати електрична енергија, што е еквивалентно на потрошувачката на поединечни градови, објавија компаниите во вторник. Плановите беа објавени на прес-конференција во Абилин, Тексас, каде што OpenAI и Oracle со месеци работеа на првиот центар за податоци брендиран како дел од иницијативата за инфраструктура на вештачка интелигенција Stargate, објави Bloomberg.
Проширувањето ги доближува компаниите значително до нивната цел да инвестираат 500 милијарди долари во домашни центри за податоци и инфраструктура за вештачка интелигенција во текот на следните четири години – ветување што нивните раководители го дадоа во првите денови од враќањето на претседателот Доналд Трамп во Белата куќа.
Новите капацитети ќе обезбедат и многу поголема компјутерска моќ за поддршка на услугите на OpenAI, вклучувајќи го и ChatGPT, кој сега го користат 700 милиони луѓе неделно.
„Ќе ги туркаме инвестициите во инфраструктурата колку што можеме, бидејќи тоа е она што ја движи нашата способност да испорачуваме неверојатна технологија и основни производи и услуги“, рече Сем Алтман (Sam Altman), извршен директор на OpenAI.
Трите нови локации – во Тексас, Ново Мексико и неименувана локација на Средниот Запад – ќе бидат развиени во партнерство со Oracle за повеќе од 5,5 GW вкупен капацитет, вклучувајќи дополнително проширување од 600 мегавати во близина на постојната локација во Абилин. Веќе во јули, OpenAI потпиша договор со Oracle за развој на до 4,5 гигавати дополнителен капацитет на Stargate, што претставува околу 300 милијарди од новонајавените 400 милијарди долари инвестиции.
Преостанатите две локации во Охајо и уште еден округ во Тексас ќе бидат развиени во соработка со SoftBank за почетен капацитет од 1,5 GW во текот на следните 18 месеци, што претставува прв заеднички проект на SoftBank во рамките на иницијативата Stargate. (Еден гигават приближно одговара на капацитетот на една нуклеарна централа.)
(Biznis.rs)
Фото- Wikimedia
