Трговски центар во Кина воведе таканаречени „капсули за оставање на сопрузи“, каде што сопругите можат да ги остават своите партнери додека пазаруваат, објавија локалните медиуми во Кина уште во 2017 година.
Според The Paper, трговскиот центар Global Harbour во Шангај постави неколку стаклени кабини каде што жените можат да ги сместат своите незадоволни сопрузи кои не сакаат да одат на шопинг.
Внатре во секоја кабина има стол, монитор, компјутер и гејмпад, така што мажите можат да седат и да играат ретро видеоигри од 1990-тите години. Услугата беше бесплатна во тој период, но персоналот изјави за The Paper во тоа време дека во наредните месеци корисниците ќе можат да скенираат QR код и да платат мала такса користејќи ги своите мобилни телефони.
Неколку мажи кои ги пробаа капсулите рекоа дека им се допаѓа идејата.
Капсулите предизвикаа многу шеги и коментари на кинеските социјални медиуми, како и дебата за тоа дали концептот може да се прошири и во други градови.
Додека некои корисници ја поддржуваат идејата, велејќи дека капсулите им даваат причина на мажите да одат на шопинг – и на крајот да ја платат сметката, други не се согласуваат. Тие велат: “Ако мојот сопруг само сака да излегува и да игра игри, зошто воопшто да го земам со мене?”.
(BBC/Bizlife)
