Европа продолжува да го предводи патот кога станува збор за работа од далечина, додека сè повеќе земји воведуваат специјални визи и програми за престој за дигиталните номади, луѓе кои работат виртуелно од кое било место во светот.
Феноменот што експлодираше по пандемијата Ковид-19 сега прерасна во глобален тренд. Милиони професионалци ја напуштија канцеларијата и се префрлија на пофлексибилен начин на работа, а владите ширум светот се обидуваат да ја привлечат оваа нова, мобилна и честопати високо платена група работници.
Според студијата на Global Citizen Solutions, која анализирала 64 земји според времетраењето на визата, финансиските услови и можностите за постојан престој или државјанство, европските земји доминираат убедливо.
„Европа, благодарение на својата стабилност, безбедност и богата културна понуда, останува најатрактивниот избор за преселба на дигиталните номади“, се наведува во извештајот.
Топ 10 земји за дигитални номади во 2025 година.
1.Шпанија
2.Холандија
3.Уругвај
4.Канада
5.Чешка Република
6.Португалија
7.Франција
8.Обединети Арапски Емирати
9.Германија
10.Малта
Зошто Шпанија е број еден? Шпанија е на врвот на листата благодарение на својата виза за дигитални номади, која овозможува работа од далечина за странски компании, но и делумно ангажирање во шпански компании – до 20% од вкупната работа.
Предностите вклучуваат високи брзини на интернет, одличен квалитет на живот и правна рамка што води до постојан престој, па дури и државјанство. За граѓаните на латиноамериканските земји, Филипините и Екваторска Гвинеја, периодот на натурализација е намален од десет на само две години.
Трошоците за живот во Шпанија се пониски отколку во поголемиот дел од северна Европа, особено во помалите градови, додека безбедноста, здравствениот систем и инфраструктурата се на високо ниво.
За да добиете виза, потребна ви е диплома од признат универзитет или најмалку три години работно искуство, доказ за приход (најмалку двојно поголем од шпанскиот минимум), здравствено осигурување и чисто криминално досие.
Холандија е на второ место благодарение на дозволата за самовработување, која отвора пат до постојан престој, иако даночниот систем не е особено поволен. Сепак, земјата нуди исклучителни услови за живот, безбедност и квалитетна инфраструктура.
Чешката Република е растечки центар за номади во Централна Европа, со прифатливи трошоци за живот и директен пат до државјанство. Португалија, со својата виза „D8“, комбинира добар интернет, стимулации за странски професионалци и умерени трошоци за живот.
Франција нема директен пат до државјанство, но има одличен квалитет на живот и брза интернет мрежа.
Германија се издвојува со својата виза за слободни работници, која овозможува престој до три години и постојан престој по пет години.
Малта, иако мала, привлекува многу странски работници со својата стабилност, здравје и фактот дека англискиот е официјален јазик.
(Bizlife)
