Германската влада одобри предлог за значително зголемување на минималната плата, која треба да се зголеми за вкупно 13,9% – најмногу откако беше воведена пред десет години. Како што одлучи владата на состанокот вчера, сегашната законска минимална плата од 12,82 евра ќе се зголеми во два чекори – во јануари на 13,90 евра на час и во 2027 година на 14,60 евра на час. Германската федерална влада со тоа ја следи препораката на независната Комисија за минимална плата.
Кога минималната плата за прв пат беше воведена во Германија во 2015 година, таа беше 8,50 евра бруто на час. Оттогаш, таа е зголемена вкупно десет пати.
Комисијата за минимална плата се состои од три претставници од работодавачите и синдикатите, претседател и двајца советници од академската заедница – вкупно девет члена. Според законот, комисијата поднесува предлог за прилагодување на минималната плата на секои две години, што федералната влада потоа може да ја направи правно обврзувачка, но не е обврзана да го стори тоа.
Препораката за зголемување, која сега е одобрена од владата, беше едногласно усвоена од претставниците на работодавачите и вработените во комисијата.
Според Федералниот завод за статистика, до 6,6 милиони луѓе би можеле да имаат корист од повисока минимална плата следната година – особено жените и вработените во источна Германија. Оние кои работат со полно работно време за минимална плата треба да заработуваат околу 190 евра повеќе бруто месечно од јануари.
(DW)
(фото: Pixabay)
