Шпанија регистрираше рекордни 76,5 милиони странски туристи во првите девет месеци од оваа година, што е зголемување од 3,5 проценти во споредба со истиот период минатата година, додека туристичката потрошувачка за прв пат надмина 100 милијарди евра, објави Националниот институт за статистика (INE).
Вкупната туристичка потрошувачка достигна 105,8 милијарди евра, што претставува зголемување од седум проценти во споредба со 2024 година, објави шпанскиот Ефе. Просечната потрошувачка по турист е 1.380 евра, додека просечната дневна потрошувачка се искачи на 204 евра, што е зголемување од 4,5 проценти.
Во септември е забележан побавен раст на туристичките пристигнувања, со 9,7 милиони посетители, што е зголемување од само 0,8 проценти во споредба со претходната година. Меѓу другите земји, само Обединетото Кралство забележа пораст на туристичките пристигнувања во септември – два проценти, додека Германија и Франција забележаа пад од 2,5 проценти и 1,6 проценти, соодветно.
Во првите девет месеци, 15,3 милиони туристи пристигнале од Обединетото Кралство, 10,2 милиони од Франција и 9,5 милиони од Германија.
По автономни заедници, Каталонија остана најпосетувана со 15,8 милиони странски туристи, Балеарските Острови забележаа зголемување од три проценти со 13,7 милиони посетители, додека Андалузија ги престигна Канарските Острови со 11,5 милиони посетители, што претставува зголемување од 7,3 проценти.
Фото – Flickr
