Британскиот бизнисмен Ричард Бренсон тврди дека ќе отпатува во вселената со помош на ракетата на неговата компанија Virgin Galactic во наредните пет месеци. Бренсон сака да отпатува во вселената и така да ја одбележи 50-годишнината од првото слетување на Месечината, кое се случило на 20 јули 1969 година.
„Сакам да одам во вселената на 50-годишнината од слетувањето на Месечината. Работиме на тоа“, изјави Бренсон пред некој ден. Претходно овој 69-годишен авантурист изјави дека целта му е кога ќе полета во вселената да има тело на триесетгодишен младич, па затоа напорно тренирал.
Бренсон се натпреварува со компанијата SpaceX на Илон Маск и со компанијата Blue Origin на Џеф Безос, а целта е испраќање на патници во вселената. Минатата година Virgin Galactic успешно лансираше летало во вселената по прв пат во својата историја. Леталото VSS Unity леташе се до работ на вселената, а потоа безбедно слета и се спушти во пустината Мохаве.
Повеќе од 600 луѓе имаат платено билети или дале депозити за лет со вселенското летало на Virgin, меѓу кои и актерот Леонардо ди Каприо и поп ѕвездата Џастин Бибер. Дваесетминутно летање со леталото чини 250.000 долари.
