Млада активистка Грета Тунберг и порача на економската и политичката елита во Давос дека „во пракса ништо не е направено за климата“, и покрај повеќемесечната масовна мобилизација на млади луѓе ширум светот, пренесува „Н1 Србија“.
„Климата и животната средина денеска се жешка тема, но во пракса ништо не е направено“, рече Тунберг на тркалезната маса во рамките на Светскиот економски форум.
Наведе дека емисиите на CO2 не се намалиле и предупреди дека проблемот нема да се реши ако не се третира како вистинска криза.
Тунберг повторно ги повика светските лидери да ги слушаат младите луѓе, пишува „Ал Џазира Балканс“.
„Не сум личност која може да се пожали дека не ја слушаат. Науката и гласот на младите не се во фокусот, а би требало да бидат“, додава Тунберг.
Првиот ден од Форумот се очекува и обраќањето на американскиот претседател Доналд Трамп. Не е познато дали Тунберг и американскиот претседател со кој имаат спротиставени ставови за климата, ќе имаат можност да се сретнат.
(Извор – Радио МОФ)
