Поради временските непогоди, секоја година државата исплаќа по 3,5 милиони евра обесштетување. Време е да воспоставиме организиран осигурителен систем за заштита на земјоделството. Само така ќе успееме да одговориме на најголемиот предизвик – климатските промени, но и да ги зголемиме посевите и приносите, како и нивниот и квалитет, рече денеска министерот за земјоделство, шумарство и водостопанство, Арјанит Хоџа.
На работилница со која почнаа активностите за воспоставување т.н. осигурителен пул, Хоџа истакна дека засега е се уште многу мал процентот на земјоделци кои ги имаат осигурано своите посеви.
Пулот, како што објасни Хоџа, е систем во кој финансиските средства се собираат на едно место.
– Парите што ги даваме сега како држава можеби ќе бидат помалку, но ќе покриваме многу повеќе и така ќе ги стиумилираме земјоделците. Работилницата е само дебата за тоа како сакаме да изнајдеме решение. Тоа ќе биде дополнително олеснување за земјоделците, но и за државниот буџет со оглед дека веќе плаќаме и штети и субвенции во осигурувањето. Сега, со попрактично управување на државните пари, ќе успееме да им даваме сигурност на земјоделците, но во исто време ќе поставиме систем во кој тие ќе имаат доверба. Нормално, ќе има дополнителни стимулации за тие да ги осигуруваат површините. Накусо, изнаоѓаме подобро решение од постоечкото, истакна Хоџа.
Тој нагласи дека климатските промени се наметнуваат како сериозна закана за земјоделското производство.
– Со години земјоделците се соочуваат со влијанието на природните непогоди за кои Министерството за земјоделство, шумарство и водостопанство и Комисијата за штети при Владата на Република Северна Македонија, исплаќа во просек три и пол милиони евра годишно на основ штети од временски непогоди. Токму затоа, решивме дека е време да воспоставиме организиран пристап за прилагодување и заштита на земјоделските производи преку воспоставување на систем на земјоделско осигурување во нашата земја, потенцира министерот.
Пулот ќе се воспостави со техничка помош на Турција, земја во која постои исклучителено функционален систем за осигурување.
– Ќе ги анализираме ризиците со кои се соочува македонското земјоделство. Би било многу рано да се каже како може во пракса тука тоа да се спроведува. Кај нас, во Турција, земјоделците можат да си земат осигурување од банка и од нашите подружници, на осигурителните компании, изјави генералната директорка на турската Аенција за управување со земјоделскиот осигурителен систем (ТАРСИМ), Серпил Ѓунар.
Вицепремиерот за економски прашања, Фатмир Битиќи истакна дека со воспоставување земјоделски осигурителен пул, еден вид фонд за осигурување на земјоделството, прв од овој вид во земјава, ќе се овозможи сигурност на земјоделското производство.
– Од економски аспект, создавањето на земјоделскиот осигурителен пул е важен чекор напред за државата, со што дополнително се приближуваме кон европските стандарди. Целта на Владата не е само да се инвестира во градовите, туку и да се реализираат проекти со кои рамномерно ќе се развиваат и руралните делови кои имаат огромен потенцијал за земјоделство. Сите добро знаеме дека земјоделството е главна гранка во руралните средини и еден од поважните сектори во РСМ. Лани учествуваше со 8,6 отсто од БДП. Бележиме тенденција на пораст со оглед дека земјоделството во БДП во 2019 година учествуваше со 8,2 процента, рече Битиќи.
Според него, во 2020 година, споредбено со 2019-та, има зголемување на обемот на производство во три од четирите квартали и годишно зголемување на производството од 1,7 отсто.
– Ова е јасен податок дека и во време на криза политиките на Владата со субвенциите и грижата даваат резултати, посочи вицепремиерот, дополнувајќи дека е зголемена искористеноста на ИПАРД програмата, како и вкупниот износ на субвенции, напомена Битиќи.
На работилницата зборуваше и претседателот на Советот на експерти при Агенција за супервизија во осигурувањето, Крсте Шајноски.
