Милијардерот Марк Лор го претстави пред светската јавност планот за изградба на новиот футуристички град Телоса во пустина во САД. Неговата идеја е идниот град да се простира на 150.000 хектари, за чија изградба би биле потребни 400 милијарди долари, пренесува Си-ен-ен.
Футуристичкиот град ќе претставува мешавина на позитивни карактеристики, и тоа чистотијата по која е препознатлив Токио, разновидноста што ја има Њујорк и квалитетот на општинските услуги што ги нуди Столкхолм.
Претставениот мастер план изработен од данскиот архитект Бјарке Ингелс предвидува Телоса да постане град на архитектура во која се имплементирани еколошки стандарди, кој ќе се заснова на искористување на обновливите извори на енергија и на водоснабдителен систем кој ќе биде отпорен на суши.
Урбанистичкото планирање на градот е идеалистичко, односно треба да им овозможи на жителите за 15 минути да можат да стигнат од своите домови до работното место, школите и другите видови објекти кои се неопходни во секојдневниот живот.
И покрај изработениот мастер план за градот, планерите и во моментов бараат локации низ САД каде што би можело да се изгради Телоса. Листата на можни сојузни држави каде би се градел овој град ги вклучува Невада, Јута, Аризона и Тексас, но е предвидено да биде пустински предел.
Идниот град е предвидено да има фантастични 5 милиони жители. Покрај тоа што би се градел еколошки, во Телоса ќе бидат забранети возилата на фосилни горива, додека жителите би уживале во огромниот јавен простор составен од зеленило.
Извор – Мета
