Шеесетина врвни Master Chef судии и околу тристотина натпреварувачи и гости од цел свет, денеска ќе го отворат Вториот Интернационален Гастрономски Натпревар – ГастроМак Македонија 2017. И по обемот и по квалитетот на имињата кои што нешто значат во светот на гастрономијата, овој настан е најголемиот кога било одржан кулинарски натпревар не само во нашата земја, туку и во поширокиот регион. Вториот Интернационален Гастрономски Натпревар – ГастроМак Македонија 2017, ќе се одвива од 24 до 28 октомври во Струмица, а домаќин ќе биде Хотелот Вила Парк. Големиот настан кој што е влезен во календарот на глобалните случувања од ваков тип, е во организација на Асоцијацијата на готвачи и шефови на кујни од Македонија – ГастроМак, со логистичка поддршка од WACS – World Association of Chefs Societies, Светската организација на шефови на кујни, асоцијација која што ги обединува националните кулинарски здруженија од преку 150 држави во светот.
”Струмица, како град, но и ние како општина, сме почестени што ќе бидеме домаќини на настан од ваков калибар. Тоа значи дека со настанот Струмица ја ставаме на светската гастрономска мапа. Струмичани ќе видат дел од гастрономските магии на големите готвачи и судии. Но, исто така, и ние како домаќини ќе имаме што да покажеме: тоа е нашата гостопримливост, а секако и традиционалната храна. Од друга страна, за нас ќе биде многу значајно тоа што ќе можеме да ги покажеме и нашите природни убавини и интересни места за странските гости, со што ќе го презентираме и туристичкиот потенцијал на општината”, изјави Коста Јаневски, Градоначалникот на Општина Струмица.
Натпреварот се одржува под мотото “Залче од светските вкусови!” и, практично, под универзалното знаме на гастрономијата, ќе го обедини светскиот готвачки крем, кој што во Струмица ќе го претставуваат судии, натпреварувачи и гости од триесетина земји, како што се: Португалија, Русија, Италија, Чешка, Велика Британија, Полска , САД, Канада, Србија, Словенија, Израел, Бугарија, Турција, Хрватска, Азербејџан, Романија, Пакистан, Грција, Албанија, Кипар, Исланд, Украина, Монголија, Босна и Херцеговина, Индија и, секако од Македонија.
“Годинешната манифестацијата ја креваме на највисоко можно рамниште. Потврда за тоа се најавените гости, потврдените WACS судии, Michelin Star готвачи, како и огромниот број натпреварувачи од сите страни на светот. Ја имаме честа со нас да се повеќе великани во светската гастрономијата, вистински гастрономски гуруа, од Канада до Русија, од Исланд до Кипар. Благодарни сме на гостопримството на градот Струмица, кој што ни дава безрезервна организациска поддршка. Од друга страна, пак, ова нè инспирира да планираме оваа манифестација во иднина да ја направиме традиционална годишна натпреварувачка ревија на шефови на кујни од светски размери во Македонија“, изјави Адријана Алачки, Претседателка на ГастроМак.
На петдневниот настан во струмичкиот хотел Вила Парк, врвните кулинирски шефови ќе си ги одмеруваат силите во три натпреварувачки денови, 25, 26 и 27 октомври и тоа во 33 категории, поделени во четири сегемнти: топло и ладно готвење, карвинг (изработка на фигури од овошје и зеленчук), како и подготовка на пица. Во исто време, во едукативниот дел, десетина експерти со Master Chef титулата ќе одржуваат повеќе Мастер класови.
Манифестацијата ќе биде од отворен карактер, така што сите заинтересирани ќе можат да ѕирнат зад готвачките боксови како се подготвуваат јадењата и десертите, но и да ги вкусат. Исто така, посетителите ќе можат да уживаат и во презентациите, дегустациите и другата програма што ја имаат подготвено ГастроМак и партнерите за време на сите денови на настанот.
