Канадски научници развија нови молекули кои би можеле да го стопираат губењето на меморијата поради старост или депресија. Научниците од Центарот за зависност и ментално здравје од Торонто и од Истражувачкиот институт за семејно ментално здравје Кемпбел развија нови терапевтски молекули кои ни даваат надеж дека може да се излечи губењето на меморијата како последица на разни болести или поради стареење.
Предклиничките тестирања покажаа дека тие молекули не само што забрзано ги подобруваат симптомите, туку значително го обновуваат оштетувањето на мозокот поради кое се губи меморијата. Тие резултати беа претставени на годишниот состанок на Американската засоцијација за напредок на науката во Вашингтон.
„Моментално не постојат лекови кои можат да ги излечат когнитивните симптоми како губењето на меморијата поради депресија, други ментални болести или стареење. Она што е единствено ветување со ова откритие е дека молекулите се специјално таргетирани на активирање на ослабените рецептори во мозокот кои предизвикуваат губење на памтењето“ изјавија истражувачите.
Научниците први идентификувале специфични оштетувања во рецепторите на мозочните клетки во GABA неуротрансмитерски систем, а потоа докажале дека тие оштетувања предизвикуваат симптоми на промена на расположение и губење на памтењето во случај на депресија и стареење. Молекулите кои потоа ги развиле се третман за тие оштетувања и дејствуваат како хемиски подобрени бензодијазепини, односно класа антианскиозни и седативни лекови кои исто така го активираат GABA системот, но не се таргетирани.
Мала доза од тие молекули во предклиничките тестови по само триесет минути ги вратила перформансите на меморијата на нормално ниво. Експериментот бил повторуван 15 пати. Во друг експеримент во кој биле вклучени предклинички модели на стареење многу брзо бил стопиран процесот на губење на памтењето, а ефикасноста по примената на тие молекули се зголемила на 80%, што во суштина е ниво кое се забележува во младоста или во раните фази кај возрасните личности. Ова подобрување траело повеќе од два месеви со секојдневно лечење.
Со оглед на големиот успех на овие истражувања, канадските научници се надеваат дека за две години отсега ќе можат да почнат клинички тестирања на луѓе и веруваат дека ова нивно откритие може да го спречи губењето на памтењето на почетокот на Алцхајмеровата болест.
